Après doas setmanas de negociacions, los caps d’estat europèus an decidit que lo bèlga Charles Michel serà lo president del Conselh Europèu; la francesa Christine Lagarde bailejarà la Banca Centrala Europèa e lo ministre dels afars exteriors de l’estat espanhòl, Josep Borrell, serà lo cap de la diplomacia e de la seguretat europèas. D’aquelas decisions, la sola causida a l’unamititat e sens discussion es estada la parisenca Lagarde, qu’es estada la directritz del Fons Monetari Internacional (FMI) dins las darrièras sèt annadas. Son eleccion inquieta qualques sectors de la societat.
 
Se recordaràn  totjorn de Lagarde en Grècia, a causa de las mesuras d’austeritat qu’i prepausèt. D’un caire, Ianis Varufakis explica en detalh las duras reünions que tenguèt amb Lagarde dins son libre Adults in the room. De l’autre, ela provoquèt un escàndol en mai de 2012 quand diguèt, dins una entrevista al jornal The Guardian que sentiá pas cap de simpatia pels grècs, e qu’exigissiá d'eles, plan mal, que paguèsson lors impòstes. E mai la granda tronada arribèt quand los jornals grècs expliquèron que, coma cap de l'FMI, Lagarde aviá l'estatut de foncionària internacionala e que, doncas, pagava pas d'impòstes (son revengut èra alavetz de 380 939 èuros).
 
Mas abans d’èsser directritz de l’FMI, Lagarde foguèt ministra de las finanças en França del govèrn de Dominique de Villepin, jos la presidéncia de Jacques Chirac. Puèi, jol mandat de Sarkozy i tornèt amb vam. Aquela experiéncia la menèt fins a l’FMI en seguida de l’escàndol provocat per son predecessor e compatriòta Dominique Strauss-Khan.
 
 
Afar Tapie: reconeguda colpabla mas dispensada de pena
 
En decembre de 2016, la Cort de Justícia de la Republica Francesa la reconeguèt colpabla de “negligéncia” e “malversacion de fonzes publics” pel dich afar Tapie. Lagarde foguèt acusada en 2014 a causa d’una indemnizacion donada a l’entrepreneire Bernard Tapie, mentre que Lagarde èra la ministra de las finanças del govèrn de Nicolas Sarkozy.
 
La cort francesa la reconeguèt colpabla, mas li impausèt pas cap de pena.
 
 
L’afar Tapie
 
En 2008, Bernard Tapie, un òme d’afars francés, recebèt fòrça argent public dins un arbitratge de l’estat, ont ganhèt dins un litigi contra lo Crédit Lyonnais, alavetz una banca estatala, que li paguèt 403 milions d’èuros. Tot aquò se passèt quand Lagarde èra ministra de l’economia e de las finanças del govèrn de Fillon jos Sarkozy.
 
Lo verdicte favorable a Tapie, amic personal de Sarkozy, causèt lo refús d’una partida de la societat francesa. Divèrses deputats del Partit Socialista faguèron lor denóncia en considerar que l’arbitratge èra pas estat brica imparcial.
 
Aqueles deputats visèron tanben Lagarde perque aviá utilizat un grop de magistrats particulars en luòc d’anar als tribunals ordinaris, quand èran en jòc los interèsses d’una institucion publica. Questionèron tanben aquela èx-ministra e uèi directritz de l’FMI per non aver pas contestat una decision qu’obligava l’estat de far un pagament milionari a un entrepreneire privat.