L’ensenhament de l’occitan contunharà al collègi Pèire  Vairon [Pierre Bayrou] de Sant Antonin (Causse de Cailutz). Après una campanha de signaturas e una mobilizacion ciutadana, l’establiment escolar visquèt diluns passat un conselh d’administracion extraordinari. “Fòrça presents per un conselh d’administracion durant las vacanças escolaras”, çò ditz a La Dépêche Véronique Raffi, presidenta de l’associacion dels parents d’escolans. “Aquò demòstra que l’occitan concernís e implica fòrça”, çò precisava. “Avèm reüssit a reünir, discutir e nos metre d’acòrd amb la còla pedagogica que trabalha per nòstres enfants, es tot çò qu’esperavi: la reüssida”, çò precisa.
 
Lo 26 de junh passat, un conselh d'administracion aviá refusat una dotacion globala d’oras per l’occitan. La principala del collègi manteniá que las oras atribuidas a l’occitan devián èsser “utilizadas per d’autras fins”. L’ensenhaira d’occitan, Linda De Lorenzo, comencèt una mobilizacion que jonguèron los parents dels escolans, de nombrosas associacions occitanistas, los cònsols màgers de Cailutz e de Sant Antonin, lo conselh departamental e la conselhièra regionala en carga de las lengas regionalas, Dominique Salomon.
 
“Avèm ganhat! Vaquí, podèm passar un bon estiu”, se regaudís De Lorenzo. L’ensenhament de l’occitan se perseguirà a la rintrada de 2019.