Pel primièr còp, de “calandrons” o escolans de Calandreta son arribats al bachelierat. Los primièrs tres calandrons a passar l’espròva son Gaëtan Gaillard, Guilhem Montviloff e Arthur Villaroya. La Confederacion Calandreta a publicat un comunicat per los benastrugar. Lo comunicat tanben felicita la còla de professors, lo director Patric Albert e Amaïa Cormier la coordinatritz del licèu de los aver acompanhats fins a la reüssida. “Esperam de veire dins las annadas venentas un fum de joves sortir d'un percors complet Calandreta, bilingües, ciutadans esclairats e dobèrts sul Mond”, çò ditz lo comunicat.
 
Las calandretas son d’escòlas laïcas e associativas qu’an un contracte amb l’estat, qu’emplegan la lenga occitana coma lenga veïculara sul programa educatiu fixat pel Ministèri de l’Educacion de França. Ara, 40 ans après sa creacion, i a de calandrons de la mairala fins al bachelierat, de la pichona seccion a la terminala dins un ret de mai de seissanta escòlas esparpalhadas per tota Occitània, amb tanben 4 collègis e 1 licèu a Pau, Tolosa e Montpelhièr.

La relacion entre los professors e las familhas es fòrça estrecha e los parents se pòdon engatjar dins lo projècte fins ont voldràn. En mai d’aquò, cada calandreta a una relacion de proximitat amb son entorn immediat, e aital la coneissença de la realitat pròcha e l’engatjament dels escolans amb l’entorn son plan nauts.