Un reportatge de VRT, la television publica bèlga en flamenc, a revelat que Google enregistra e analisa mai d'una convèrsa privada dels usatgièrs a l’escala mondiala mejançant lo nautparlador intelligent Google Home. La societat estatsunidenca o a reconegut e mai soslinhe qu’escota solament un 0,2% del total de las convèrsas qu’enregistra e que s’agís de convèrsas dels usatgièrs amb l’assistent virtual.
 
VRT aguèt accès a un milièr de convèrsas e a raportat que, après las aver escotadas, poguèron determinar ont èra lo lotjament dels enregistrats mejançant aquela tecnologia. VRT assegura tanben que l’informacion a la quala accedís Google s’enregistra sens que l’usatgièr aja besonh de prononciar las paraulas qu’activan lo dispositiu (“Ok Google” e “Hey, Google”). Totun, la societat a refusat aquelas informacions e a dich qu’aquel metòde d’analisi de convèrsas a per tòca de melhorar la tecnologia de votz gràcias a la transcripcion d’un pichon ensemble de paraulas,
e assegura que prendrà de mesuras contra la revelacion de sos enregistraments a la cadena bèlga, que considèra coma una “violacion” de sas politicas de seguretat de donadas.