capçalera campanha

Actualitats

InternacionalPoliticaSocietat

L’atemptat terrorista de Barcelona èra restacat als servicis secrets de l’estat espanhòl

Lo jornal Público publica de documents escriches que demostrarián la relacion dirècta entre lo CNI e lo cervèl dels atemptats fins al darrièr moment

| Canaan
Lo jornal espanhòl Público ven de revelar que lo servici secret  de l’estat espanhòl (CNI) èra en contacte amb l’imam de la vila de Ripoll, Abdelbaki Es Satty, cervèl dels atemptats terroristas que los patiguèron Barcelona e Cambrils en agost de 2017, e ont moriguèron 15 personas e mai d’un centenat foguèron nafradas. Segon aquelas informacions, Es Satty èra confident del CNI fins al moment de sa mòrt, qualques oras abans los atemptats, e lo CNI èra al corrent que los terroristas preparavan aquela ataca sus la Rambla de Barcelona. Público presenta de documents escriches que demostrarián la relacion dirècta entre lo CNI e Es Satty fins al darrièr moment. E mai anóncia que dins los jorns avenidors publicarà de nòvas pròvas.
 
Segon aquelas informacions, lo CNI e Es Satty comunicavan amb la tecnica de la boita mòrta, que consistís a escriure de borrolhons de messatges sens los mandar jamai dins una meteissa boita que las doas personas que comunican entre elas i accedisson. Atal pòdon parlar sens que l’informacion circule sul ret. Lo darrièr messsatge d’aquela “boita mòrta” es del 19 de junh de 2017, dos meses abans l’atemptat, quand ja se’n fabricava las bombas previstas.
 
En mai d’aquò, Público a agut l’accès als rapòrts del CNI que demòstran que los membres del grop terrorista de Ripoll èran contrarotlats pel servici espanhòl d'entresenhas que n’escotava las convèrsas e ne seguissiá los movements. Público assegura que lo CNI contrarotlèt lo grop terrorista fins al jorn de l’ataca, e l’endeman escafèt l’informacion d’Es Satty de sos archius.
 
 
Èra previsible
 
Las informacions que ven de revelar Público èran previsiblas. O publicàvem sus Jornalet lo 19 de febrièr de 2018 en seguida d’una tièra de fiuladas qu’aviá publicadas sus Twitter Mireia Boya. L’èx-deputada occitana del Parlament de Catalonha pressentiá ja alavetz que l’encarceracion del conselhièr de l’Interior de Catalonha, Joaquim Forn, e la destitucion del cap de la polícia catalana, Josep Lluís Trapero, avián quicòm a veire amb tota aquela guèrra bruta de l’estat espanhòl contra l’independentisme catalan.
 
De soslinhar que la gestion que faguèron Forn e Trapero foguèt remirabla e qu’aquestes capitèron a desactivar la cellula jihadista en pauques jorns, en tot evitar d’atemptats fòrça pus sagnoses. En seguida d’aquò, la polícia espanhòla e la Gàrdia Civila planguèron qu’aquela gestion mostrèsse l’imatge “d’un estat catalan autosufisent”.
 
 
L’escandalosa relacion de l’imam de Ripoll amb lo CNI
 
De fach, Boya èra pas la primièra a expausar aquela sospiècha, e mai o faguèsse net e clar. En genièr de 2018, los deputats d’ÈRC e del PDECat del Congrès dels Deputats espanhòl demandèron la compareissença del ministre de l’Interior, Juan Ignacio Zoido, per qu’esclarisquèsse los ligams de l’imam de la vila de Ripoll, Abdelbaki Es Satty —cervèl d’aqueles atemptats— e lo CNI, lo servici d’entresenha e contraespionatge espanhòl.
 
Segon qualques informacions destapadas en novembre de 2017, Es Satty foguèt informator  del CNI almens durant los ans 2010 e 2014.

 

 

 


 

 

 


 
 
 


 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Miqueu Pujol aurellhan 65
9.


No sembla pas confirmada aquera novelassa ! QU'ESPèRI QUE jORNALET FARA mea cuLpa D'AVER PUBLICAT AQUÒ sense cap de recuu!

  • 0
  • 0
Pujol aurelhan 65
8.

Qu'attendi de saber s'ei un novèla verificada. Que seria un escandal terrible !

  • 0
  • 0
Abram Auvèrnhe
7.

E coma totjorn quand s'agís de Catalonha, se'n diguèt pas un mot dinc los jornaus frances ! Sens Jornalet, sèi segur qu'auriá pas jamai saubut ren d'aquela informacion... Un brave mercé !

  • 4
  • 0
Michèle Colençon-Felgerolles Rouis
6.

#4 Aquò òi !

#3 La vila de Vichèi n'a son cofle d'èstre sovent associada au regime collaboracionista de Pétain, ço díson d'elegits locaus. Vichèi es mai qu'aquò dinc l'Istòria !
Es coma s'aparelhaviam de lònga Alemanha e nazisme.
Coma se nòstres rèire-felencs deviáun cargar la reputacion de lurs rèire-grands e ne'n culpabilizar. Coma se, dinc un vilatge, los abitants deviáun mespresar un dals lurs perque son grand èra un ibronhàs que batiá femna emb d'efants.
Coma se mos paures rèires paisans que restàvon dinc lurs montanhas despièi de generacions aviáun degut se blaimar la conciença per ce qu'es de la colonizacion d'Argeria per l'Estat francés.
Fariá bòn atrapar una autra apelacion, pasmens...

#1 E siái segura que l'Estat francés es pas completament inocent dinc un parelh d'atentats que maquèron nòstra societat.

  • 5
  • 0
francesc palma
5.

Los serveis de contraintel·ligència an uns caps que los dirigeissen, que estaven ocupats en espiar a Puigdemont e tota la resta de missatges alarmants de la preparacion de l'atemptat no 'ls importava un rava.

  • 3
  • 1

Escriu un comentari sus aqueste article