Malgrat que los prèmis Nobel foguèron anonciats l’octòbre passat, es uèi que se liuran, en commemoracion de l’anniversari de la mòrt de l’entrepreneire suedés Alfred Nobel. Ongan lo budgèt consacrat a la ceremonia e a l’argent dels premiats s’es redusit notablament, pr’amor de la situacion economica. Cada premiat recebrà 1,1 milions de dolars, 20% mens que fins ara, al delà de la medalha d’aur e lo diplòma.
 
La Fondacion Nobel o aviá ja anonciat lo junh passat, en disent que caliá refrenar la despensa exagerada dels darrièrs decènnis per salvar lo sieu capital en pensant a long tèrme.
 
La ceremonia de liurament dels prèmis d’economia, fisica, literatura, medecina e quimia se debana uèi a Estocòlme, e lo de la patz se liura a Oslo, la capitala de Norvègia, a l’encòp.
 
Pendent tota la setmana passada s’es debanada la Setmana dels Nobel, amb de conferéncias de totes los premiats.