La vila congolesa de Goma, amb mai d’un milion d’abitants, a declarat son primièr cas d’Ebòla, çò que marca un progrès cap al sud de l’epidemia que comencèt en agost de l’an passat. L’epidemia es la segonda pus grèva de l'istòria recenta d’Africa e a tuat, ara per ara, mai de 1600 personas e n’a afectat gaireben 2500.
 
Lo Ministèri de la Santat congolés a explicat que lo pacient es un pastor evangelic de la vila de Butembo, que se tròba a 200 quilomètres al nòrd e qu’es un autre dels epicentres de la malautiá. Lo malaut seriá arribat a Goma lo 14 de julhet passat, çò assegura lo ministèri dins un comunicat. E mai assegura que “lo risc de propagacion de la malautiá a la rèsta de la vila es bas pr’amor que lo pacient es estat isolat”.
 
Goma s’aprèsta dempuèi de meses a l’arribada del virus Ebòla amb l’installacion d’estacions per se lavar las mans e de mesuras addicionalas d’igièna pels foncionaris e pels emplegats del sector dels servicis. Ça que la, dins las zònas ruralas, lo virus es estat de pièger conténer a causa de l’accion dels grops armats e de la mesfisança dels tradicionalistas envèrs los cooperants e los mètges.