La populara aplicacion de telefòn mobil FaceApp es venguda fòrça populara dins los darrièrs jorns. Permet d’editar de fotografias per que las personas semblen pus vielhas, pus joves, d’un autre sèxe, amb una barba... tot aquò d’un biais fòrça realista. De milions d’usatgièrs an acceptat las condicions de l’aplicacion per la far foncionar e partejar lors imatges suls rets socials. Ça que la, cal far atencion a çò qu’acceptam per far servir aquela aplicacion, mai que mai se li donam lo drech d’emplegar totas nòstras informacions personalas d’usatgièrs e nòstras fòtos amb de tòcas comercialas. L’usatgièra de twitter Elizabeth Potts Weinstein a detectat qu'al moment de signar los tèrmes e las condicions de l’aplicacion, se cedís a FaceApp lo drech d’emplegar sos images, son nom, sa votz e son identitat amb de tòcas comercialas.
 
Segon los tèrmes de l’aplicacion, quand s’accèpta aquelas condicions s’admet “una licéncia amb drech de joslicéncia transferibla, perpetuala, irrevocabla, non exclusiva, mondiala, totalament pagada, per emplegar, reproduire, modificar, adaptar, publicar, traduire, distribuir, executar publicament e mostrar lo contengut dels usatgièrs e quin nom que siá, nom d’usatgièr o imatge proporcionat dins totes los formats e canals de mejans coneguts o desvolopats posteriorament, sens cap de compensacion”.
 
Una autra question polemica es qu'indican que pòdon transferir las donadas d’un país a un autre per tal d’agir legalament. Es a dire, que se las leis europèas permeton pas de far quicòm amb nòstras donadas, mas que la lei estatsunidenca o permeta, passaràn nòstras donadas dins aquel país.
 
 
Basa de donadas pels sistèmas de reconeissença faciala
 
Lo jornal estatsunidenc The New York Times a publicat un article qu’explica qu’aquelas aplicacions amassan de fòtos de fàcia dins l’encastre de la corsa entrepresariala per crear de sistèmas de reconeissença faciala d’avantgàrdia. Aquela tecnologia permet d’identificar las personas en analisant fòrça imatges numerics, mas a de besonh d’una basa de donadas larga per un resultat mai precís. “Las societats e los laboratòris an amassat d’imatges facials pendent mai d’un decenni, e las basas de donadas son, simplament, un dels elements necessaris per crear una tecnologia de reconeissença faciala. Pasmens, lo mond sabon pas sovent que lors caras son arribadas aquí”, çò ditz l’article.
 
 

They are overwhelmed but allegedly: "Users are able to remove their data from Faceapp's servers by going to Settings > Support > Report a bug and typing the word "privacy" in the subject line."

— Elizabeth Potts Weinstein (@ElizabethPW) 18 de juliol de 2019

 

Discussing #FaceApp on KTVU Fox 2 today: https://t.co/z6Qishn1Xj

— Elizabeth Potts Weinstein (@ElizabethPW) 18 de juliol de 2019