Segon una senténcia de la Cort Suprèma neerlandesa, los Païses Basses an lor part de responsabilitat del genocidi d’Srebrenica de 1995, çò es lo 10% d’aquela responsabilitat. Pels jutges es, doncas, una responsabilitat calculabla e minimala.
 
L’11 de julhet de 1995, durant la guèrra dels Balcans, los òmes comandats pel general Ratko Mladić entornegèron la vila d’Srebrenica, tota plena de refugiats, e i intrèron sens cap de mena d’oposicion del contingent neerlandés de Cascos Blaus de l’ÒNU. Las fòrças sèrbas i assassinèron mai de uèch mila òmes e gojats e n’expulsèron vint mila personas.
 
Per aquel masèl, lo mai grand d’Euròpa après la Segonda Guèrra Mondiala, se jutgèt al Tribunal Penal Internacional e se condemnèt per crimes de guèrra lo president de Serbia Slobodan Milošević (que moriguèt en preson en 2006), lo president dels sèrbes de Bòsnia, Radovan Karadžić, aquestes dos darrièrs coma instigators, e mai lo general Ratko Mladić, coma executor.
 
A aquel chaple s’apondèt l’abandon de la comunautat internacionala: tant per la negligéncia dels Cascos Blaus desplegats sus plaça coma per çò que lo revelèt lo jornal The Guardian: valent a dire que la casuda d’Srebrenica fasiá partida de l’estrategia del Reialme Unit, de França, dels Estats Units e quitament de l’ÒNU per obténer la patz a quin prètz que foguèsse, en liurant la vila a Mladić.
 
 
La responsabilitat neerlandesa
 
Lo jorn del masèl, lo general sèrbe Ratko Mladić se reüniguèt amb lo cap de las tropas de l’ÒNU dins la region, qu’èra lo coronèl neerlandés Thomas Karremans. Dins aquela reünion, lo militar dels Païses Basses accediguèt a totas las demandas de Mladić. D’aquel encontre s’enregistrèt d’imatges de vidèo ont se pòt veire lo coronèl Karremans a recebre de presents de Mladić, a beure d’aigardent amb el. D’aquel enregistrament, cal soslinhar los imatges dels soldats neerlandeses que dançavan e festejavan quand tornavan a l’ostal.
 
Segon lo militar dels Païses Basses, Mladić aviá capturat los soldats neerlandeses e aviá menaçat lo colonèl Thomas Karremans de lo tuar se liurava pas los 350 òmes bosnians en edat militara qu’èran dins sa casèrna. Demest las personas liuradas i aviá los traductors, los assistents, lo cònsol màger de Srebrenica e los conselhièrs municipals.
 
 
E las victimas auràn un 10% de çò que reclamavan
 
La fondacion Maires d’Srebrenica aviá fach sa denóncia contra l’estat olandés per sa presumida responsabilitat dins lo genocidi. La fondacion, que representa aperaquí 6000 personas, de parents de mond assassinats ailà, afirma que lo país saupèt pas defendre las victimas. La senténcia reclama als Païses Basses una compensacion per los parents afectats.
 
Ara, segon la justícia neerlandesa, aquela manca de coratge dels militars d’aquel país se calcula a un 10%, e es çò que recebràn los parents de las victimas: un 10% de çò que reclamavan.