Creis la tension entre los govèrns dels Reialme Unit e d’Iran après que lo petrolièr britanic Stena Impero es estat capturat per las autoritats iranianas dins l’estrech d’Ormuz e menat al pòrt de Bandar Abbas. Downing Street a cridat l’ambaissador iranian a Londres e a avertit totes los vaissèls britanics de navigar pas per l’estrech d’Ormuz, una rota màger pel comèrci del petròli.
 
Lo ministre britanic dels afars estrangièrs, Jeremy Hunt, a parlat amb son omològ iranian, Mohammed Javad Zarif, per exigir la liberacion del naviri e exprimir son chepic. A mai, Hunt a dich als mèdias qu’una accion militara es possibla. Dins aquel sens, a exigit de Teheran una solucion rapida se vòl pas de “consequéncias importantas”.
 
De lor latz, las autoritats iranianas asseguran que capturèron l’Stena Impero pr’amor qu’aviá mancat al drech maritim e percutit una nau de pesca e que prendràn pas cap de decision fins que l’enquista esclarisca los faches. Las 23 personas de l’esquipatge del naviri britanic, la majoritat de ciutadanatge indian, son gardadas per la polícia iraniana.
 
Iran a arrestat un segond petrolièr amb lo drapèl de Libèria que servís una societat britanica. Puèi foguèt liberat. En aquel cas, Teheran assegura que l’aviá retengut temporàriament per una question environamentala.
 
 
Un petrolièr iranian capturat e Gibartar
 
Ara, la captura del vaissèl britanic arriba dins l’encastre d’una granda tension entre los dos païses, après que la Cort Suprèma de Gibartar a perlongat de 30 jorns l’arrèst d’un petrolièr iranian confiscat lo 4 de julhet. Lo govèrn iranian aviá avertit de  “consequéncias” per la captura de son vaissèl e la considerèt una “accion de piratariá”. Gibartar reten aquí lo petrolièr iranian en assegurant que sa destinacion èra un pòrt sirian somés a de sancions europèas. Mas Iran o a desmentit.
 
 
Corbyn acusa Trump de fomentar la tension
 
Lo cap de l’oposicion britanica, lo trabalhista Jeremy Corbyn, a exigit tanben la liberacion de l’Stena Impero e de l’esquipatge. “Una escalada pot sonque agravar lo conflicte. Las doas parts se devon conténer”, çò a dich sus Twitter. En mai d’aquò, Corbyn acusa lo president dels Estats Units, Donald Trump, de fomentar la tension après aver s’èsser retirat del pache nuclear amb Iran.
 

The UK tanker under Iranian control, and its crew, must be released. Escalation risks a deeper conflict, all sides must show restraint. Trump tearing up the Iran nuclear deal has fuelled confrontation. Its negotiated reinstatement is essential to defuse threat of war in the Gulf.

— Jeremy Corbyn (@jeremycorbyn) July 20, 2019

 
Devèrs una autra guèrra pel petròli
 
Aqueles faches seguisson l’abatatge d’un dròne dels Estats Units, que l’armada iraniana tombèt quand subrevolava son territòri. Ara, las menaças dels Estats Units contra Iran s’apondon a la guèrra entre Iran e l’Arabia Saudita, amb l’escaquièr en Iemèn, mentre que la comunautat internacionala crenh una escalada de la tension.
 
 
Imatges vidèo de la captura de l’Stena Impero per las autoritats iranianas: