Las donadas positivas del darrièr sondatge d’usatges lingüistics en Aran marcan la 26a edicion de la corsa “Aran per sa Lengua”, que cada an se ten totjorn lo darrièr dimenge de julhet e es organizada pel collectiu aranés Lengua Viua. “Qui ten era lengua ten era clau”: es totjorn lo lèma d’aquela corsa, extrach d’un poèma de Frederic Mistral.
 
L’eveniment es una de las fèstas revendicativas mai popularas en Aran. Los participants s’amassan d’ora de matin als tres extrèms de la Val: Montgarri, Les e lo Pòrt de Vielha, e partisson a pè o en corrent, e en manjant o bevent amassa dins las vilas del percors. Es de soslinhar aqueste esperit convivial que marca la jornada de tot un país en movement per amor de sa lenga.


De ser, quand totes seràn reünits sus la plaça, se farà ausir las revendicacions per l’usatge social de l’occitan en Aran, s’autrejarà lo prèmi Lengua Viua e se clavarà la jornada amb un concèrt de Nadau, que, coma cada an, fa dançar los joves e los grands sus la plaça dins un concèrt fòrça animat.