capçalera campanha

Actualitats

PoliticaSocietat
crotz-tolosaCreated with Sketch.ProvençaComtat de NiçaCostiera Niçarda

Niça: lo procuraire a disculpat la polícia de l’agression contra Geneviève Legay per embarrassar pas Emmanuel Macron

L’endeman de l’agression que la patiguèt l’activista de 73 ans al cap, Macron aviá assegurat que Legay èra “pas estat en contacte amb las fòrças de l’òrdre”

Lo procuraire de la Republica a Niça a disculpat la polícia de l’agression contra Geneviève Legay, per embarrassar pas Emmanuel Macron. Es atal que Jean-Michel Prêtre a justificat li fach de reabilitar los policièrs que nafrèron seriosament al cap l’activista niçarda de 73 ans lo 24 de març passat.
 
Demest las diferentas explicacions qu’a donadas lo magistrat dins lo quadre de son audicion demandada pel director dels servicis judiciaris en abril passat, Prêtre a afirmat qu’aviá pas volgut metre lo president de França dins l’embarràs “emb de divergéncias tròp importantas” entre las versions. De soslinhar que l’endeman de l’agression, lo president Macron aviá assegurat dins Nice-Matin que Legay èra “pas estat en contacte amb las fòrças de l’òrdre”. En mai d’aquò, lo president desirava per ela “saique una forma de saviesa”. Aquelas paraulas descadenèron una polemica.
 
Lo ministèri de la justícia francés a refusat de comentar las afirmacions de Prêtre als jornalistas de Le Monde en estimant qu’el “es totalament independent”.
 
Geneviève Legay es militanta d’Attac. Foguèt seriosament nafrada al cap per la polícia mentre que manifestava sus la Plaça Garibaldi de Niça lo 24 de març dins l’encastre de las protèstas dels Gilets Jaunes. Qualques jorns après son agression, se publiquèt d’imatges vidèo qu’obliguèron lo procuraire d’admetre qu’un policièr èra lo responsable de la casuda de Legay. Lo policièr exprimiguèt sos “sincèrs pentiments” mas se defendèt en disent d’aver agit “dins l’estricte respècte dei òrdres”.

 
 


 
 


 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

Pitaluga
4.

Coma en Espanha, e endacòm mai, lo poder judiciari e lo poder politic son confonduts. Fòrça jutges son al servici de la policia e del govèrnament.

  • 9
  • 0
francesc palma
3.

Ja sabem que o a fait non per embaraçar a Na Macrona, senon per embarassar al poble e a la paura que li donaren una palhissa.

  • 4
  • 0
Emmanuèl Isopet
2.

Dins aqueste afar i a una causa interessanta es la diferéncia entre la policia (que comandava "l'accion") e la gendarmaria. Lo comandant de la seccion de gendarmas mobils qu'èra present e jols òrdres de la policia, refusèt d'engatjar sos gendarmas dins una carga que jutgèt "sens necessitat". Aquò es estat escrich (totes los gradats fan un rapòrt de fin d'operacion, e encara mai los qu'an refusat d'aplicar un òrdre). La Justicia es donc al corrent, mas calguèt de "fuites" dins la premsa per n'èsser assabentat. I a donc de gradats de la gendarmaria mobila (que podèm pas suspectar d'èsser de gilets jaunas amagats o de novelaris dins lo manten de l'òrdre) qu'an jutjat que la carga que nafrèt aquesta femna èra "disproporcionada". Mas la justicia ne dicidis autrament per de rasons qu'an pas res a veire amb la vertat reala. L'instruccion de l'afar, menada per la conjunta del comandant de policia que menèt l'operacion daissava pas esperar mai.
https://www.mediapart.fr/journal/france/240619/affaire-legay-la-gendarmerie-refuse-d-obeir-au-commissaire-de-nice
https://www.mediapart.fr/journal/france/050519/affaire-legay-nouveau-conflit-dinteret-et-zones-dombre-dans-lenquete-la-commissaire-en-charge-de-lenquete

  • 12
  • 0
Franc Bardòu
1.

Lo policièr exprimiguèt sos “sincèrs pentiments” mas se defendèt en disent d’aver agit “dins l’estricte respècte dei òrdres”. Çò que vòl dire que los òdres èran donc de fotre a còps de pè dins lo crani d'una vièlha dòmna de 73 ans tombada a tèrra jos l'accion de la polícia ? M'avètz dit "Republica" ?…

  • 17
  • 0

Escriu un comentari sus aqueste article