Lo ministre de las fiinanças francés, Bruno Le Maire, a ratificat l’intencion del govèrn del cap de govèrn Philippe de crear una taxa suls servicis numerics, sonada taxa GAFA, malgrat la menaça del president dels Estats Units, Donald Trump, d’i respostar amb de tarifas doanièras, mai que mai contra lo sector vinicòla. Le Maire a respondut  que “mesclèsse pas” las doas questions.
 
“Volèm aver un impòst numeric just”, çò diguèt lo ministre als mèdias quand li pausèron la question sus las fiuladas menaçantas de Trump. “Vos prègui, mesclem pas las doas questions. La question clau aquí es cossí aténher lo consens necessari per obténer una imposicion justa de las activitats numericas”, çò reïterèt.
 
Lo president francés, Emmanuel Macron, a ja anonciat un impòst d’un 3% sus la chifra d’afars de las grandas companhiás de servicis numerics, causa qu’estúdian tanben d’autres govèrns europèus coma l’espanhòl.
 
Lo 19 de julhet, Trump e Macron parlèron per telefòn e lo president estatsunidenc li mostrèt son chepic per aquel impòst. Dissabte, anoncièt sus Twitter que dins los jorns avenidors realizariá una “accion recipròca e substanciala”. “Ai totjorn dich que lo vin estatsunidenc es melhor que lo vin francés”, çò escriguèt en menaçant de taxas doanièras lo sector viticòla francés. Aquela menaça tocariá de rebucada los vinhairons occitans.
 
Le Maire insistiguèt per dire que França renonciariá a l’impòst se s’arribava a un acòrdi global sus la taxa GAFA, çò que Macron cèrca d’aténher a la reünion del G-7 que se tendrà lo mes que ven a Biàrritz (Bas Ador).
 
 

France just put a digital tax on our great American technology companies. If anybody taxes them, it should be their home Country, the USA. We will announce a substantial reciprocal action on Macron’s foolishness shortly. I’ve always said American wine is better than French wine!

— Donald J. Trump (@realDonaldTrump) July 26, 2019