Lo jornalista lemosin Sèrgi Rigot moriguèt dimenge passat mentre que realizava un reportatge sus la corsa d’Aran per sa Lengua, a causa d’una crisi cardiaca del temps que fasiá son trabalh. La darrièra persona qu’el l’entrevistèt es Ròsa Salgueiro, del collectiu Lengua Viua, qu’organiza la corsa aranesa.
 
Aderent de l’Institut d’Estudis Occitans de Lemosin dempuèi lo mes de junh e jornalista de Radio Vicomté a Maiçac (País de Briva), Rigot s’èra gandit en Aran per far un reportatge ràdio sus la corsa qu’a luòc en Aran cada darrièra dimenjada de julhet per l’usatge social de la lenga occitana.
 
La corsa d’Aran per sa Lengua es l’eveniment revendicatiu màger de la Val d’Aran, e dimenge passat èra sa 26a edicion. Mai de mila araneses se son bolegats un còp de mai per la lenga dins una corsa dempuèi los tres extrèms de la Val d’Aran per s’amassar de ser a Vielha. Aquí, après los parladisses revendicatius e la remesa del prèmi Lengua Viua, se clavèt la jornada amb un animat concèrt de Nadau.
 
 
Xavi Gutiérrez laureat del prèmi Lengua Viua
 
Lo laureat del prèmi Lengua Viua d’ongan es estat lo poèta aranés Xavi Gutiérrez Riu per son prètzfach en favor de la lenga del país. Son darrièr trabalh es la rejoncha de poesia Bestiauuu! Libre de poèmes de bèsties, bestiòtes e bestieses. Se tracta d’un libre que s'adreiça a totes los publics amb un poèma per caduna de las bèstias presentas acompanhat d’una illustracion de Ricard Novell e d’un pichon lexic. Es estat distribuit a las escòlas de la Val d’Aran.
 
Amb l’artista provençal Rodín Kaufmann, Gutiérrez representèt la lenga occitana qu’èra a l’onor dins lo XXVIn Seminari de Traduccion Poetica que l’organiza la Generalitat de Catalonha.

 

Un an mès, Vielha acuelh era fin dera hèsta dera corsa Aran Per Sa Lengua ena Plaça dera Glèisa, plea de gent arribada de toti es parçans dera Val d'Aran. Nadau met musica ara jornada reivindicatiua dera identitat aranesa. #aranpersalengua#VielhaeMijaran#Vielhadetotipic.twitter.com/TIXdX2n2IU

— Vielha e Mijaran (@vielhaemijaran) July 28, 2019

 

Bon dia, bon deluns e bona setmana tà toti!
Eth poèta aranés Xavi Gutiérrez Riu qu'ei eth guierdonat damb eth Prèmi #LenguaViua que s'autregèc agèr ser ara ocasion dera corsa #AranPerSaLengua, en reconeishença ath sòn trabalh ena promocion der #occitan#aranés. Felicitats! pic.twitter.com/T1vNoKUYD0

— Occitan aranés (@occitan_aranes) July 29, 2019