Lo prince eiretièr de l’Arabia Saudita, Muhammad Bin Salman, prevei de bastir una vila futurista. Se la fa, la vila aurà una superfícia de 26 500 Km², la sonarà Neom e la plaçarà a l’extrèm nòrd-oest del país sus la frontièra amb Jordania a la riba del golf d’Aqaba e de la mar Roja.
 
Bin Salman presentèt lo projècte en octòbre passat en explicant que la vila foncionariá independentament “de l’encastre governamental existent” e qu’auriá quitament son “sistèma judiciari autonòm” e sas règlas fiscalas. Se presenta coma una “zòna internacionala independenta” pensada solament per las personas ricas.
 
Aquela enòrma ciutat vòl èsser completament automatizada, amb de taxis volants, de drònes amb de tecnicas de reconeissença faciala per susvelhar e contrarotlar la populacion e de pargues abitats de robòts dinosaures. E mai es prevista una luna artificiala e que i aja de nívols tanben artificials que fagan plòure quand se voldrà.
 
Lo prince saudita vòl que s’installen dins la vila plusors espitals de biotecnologia que sián a la poncha de la recèrca genetica, de la bioengenhariá e de las cellulas maire, e que se prepause un torisme de naut nivèl. Es son idèa per cercar una economia alternativa al petròli.
 
 

Aiming to streamline personalized medicine and medical efficiency, people in @NEOM will be able to create their own "digital twin."
@AlArabiya_KSApic.twitter.com/a98rCA1w7J

— SAPRAC (@SapracOrg) July 30, 2019