Lo naviri umanitari catalan Open Arms a socorregut 52 personas que viatjavan dins un batèl qu’èra a mand de naufragar en Mediterranèa e ara demanda un pòrt segur ont poder desbarcar. Lo president de l’organizacion umanitària, Òscar Camps, a explicat sus Twitter que la nau de salvament aviá localizat un batèl  a la deriva ont intrava d'aiga e qu'èra talament inclinat qu’èra a mand de s’enfonzar. Dins la barca se trobavan 52 personas, dont 16 femnas e dos enfants. “Ara nos cal un pòrt segur”, çò ditz Camps en partejant d’imatges de la barca salvada e de l’operacion de socors.
 
L’Open Arms a vist còp sec lo refús d’Itàlia. Tanben lo naviri alemand Sea Eye salvèt 40 personas davant las còstas de Libia e ara las doas naus se tròban dins la meteissa situacion.
 
 
Desobesir a las autoritats espanhòlas
 
Las autoritats espanhòlas avián enebit al vaissèl Open Arms de tornar far d’operacions de salvament en Mediterranèa. La còla umanitària e los ciutadans solidaris manifestèron per carrièras darrièr lo lèma “puslèu en preson que complices”.
 
Après sièis meses de blocatge al pòrt de Barcelona, en abril passat li permetèron de partir per portar d’ajuda umanitària a l’illa de Lèsbos. Ara, qualques meses pus tard, l’organizacion umanitària a decidit de desobesir a  l’enebicion per salvar la vida de mièg centenat de migrants en mar.
 
D’autre caire, lo Parlament de Catalonha a anonciat aqueste mes de julhet qu’autrejariá a medalha d’aur de la cambra a Òscar Camps, president e fondador de l’organizacion umanitària Proactiva Open Arms, e tanben a Carola Rackete, la capitanessa del Sea Watch. Atal, los membres de l’assemblada catalana vòlon reconéisser “lor determinacion a defendre los dreches umans”.