La primièra version del projècte de lei de descentralizacion de l’Estat francés, arbitrat ièr al palais de Matignon, a París, conten 79 articles. S’agís d’un projècte fòrça complicat amb doas nòvas instàncias: lo conselh dels territòris e las conferéncias territorialas. Per rapòrt a las lengas que son pas lo francés es previst un plan de desvolopament que serà competéncia de las regions, ont l’ensenhament d’aquelas lengas se pòt far d’un biais facultatiu pendent las oras d’obertura dels establiments escolars.

Lo projècte de lei transferís a las regions lo poder economic: l’aprendissatge, la formacion professionala, lo desvolopament economic e la gestion dels fonzes europèus. La politica sociala serà la tòca dels departaments.
 
D’un autre costat, lo tèxte instituís 3 eurometropòlis: Lilla, Lion e Marselha, que poirián recuperar lo poder dels departaments e la gestion dirècta de las grandas infrastructuras de l’Estat.
 
Per çò que tanh a l’argent, las regions poirián beneficiar d’una fraccion de las taxas del transpòrt, dels sieus locals comercials, burèus e parcatges. Lo tèxt promet tanben d’introdusir un critèri d’intrada en la taxa d’abitança, una mesura qu’es estada fòrça demandada per maites expèrts.
 
L’Estat prevei que dins lo cas de sancions europèas, las collectivitats ne poirián patir las consequéncias financièras.
 
Fin finala pas es previst que la comission consultativa pòsca retocar una nòrma.
 
Las regions actualas se modifican pas a la realitat sociala e umana, e son luènh de poder prepausar e votar de leis.
 
Lo projècte de lei parla de las “lengas regionalas”, es a dire, aquelas lengas nacionalas que son pas lo francés. Es previst un plan de desvolopament que serà competéncia de las regions, ont l’ensenhament d’aquelas lengas se pòt far d’un biais facultatiu pendent las oras d’obertura dels establiments.
 
Ça que la, es tostemps l’Estat que decidís los contenguts de l’educacion, e l’ensenhament de las lengas mal nomenadas regionalas, pòt pas interferir aqueles contenguts.