Catalans: la fin de las illusions
 
Aprèp la partida contra Warrington, amb de jogaires suspenduts (Tomkins, 3 partidas; McIlorum: 2 partidas) e nafrats (sason acabada per Foad Yaha, tocat al genolh), los Dragons anavan ça que la del costat de Leeds aqueste divendres per confirmar lor classament dins las primièras 5 plaças.
 
Mas tot anèt de travèrs: las passas arribèron pas als destinataris, la defensa èra demorada al vestiari. Dins lo segond temps, Leeds prenguèt un carton roge, aquela superioritat numerica cambièt pas res a l’afar e a la nòta salada finala: 48-8.
 
La qualificacion per las pelhòfas ven de mai en mai illusòria. Per gardar qualques espèrs magrinèls, demòra als catalans de se tornar metre dins lo bon sens aqueste dissabte a Brutus amb la recepcion de Londres (qu’i venguèt ganhar fa dos meses!)
 
De son costat, amb la victòria cò de Widnes 28-12, lo Tolosa Olimpic assegura sa participacion a la fasa finala del Championship e pòt somiar de montar en Superliga.

 
Palma redonda e cultura bretona
 
Aquí un exemple vengut de Bretanha que poiriá inspirar las formacions occitanas (e catalanas) de rugbi. Cinc formacions bretonas son engatjadas en Liga 1 (Nantas, Rennas, An Oriant) e 2 en Liga 2 (Brèst, Gwengamp) de fotbòl.
 
Aquò significa 6 dèrbis dins la sason en Liga 1 e 4 en Liga 2 (lo primièr entre An Oriant e Gwengamp lo 30 d’agost), doncas 10 partidas concernidas per l’acòrdi.
 
Los responsables dels clubs e del mond cultural se son rescontrats, amb lo sosten de la region Bretanha. Son tombats d’acòrdi per assegurar la promocion de la cultura bretona (e pas solament) dins aquelas partidas: preséncia de la mai granda bandièra bretona del Mond; animacion musicala assegurada per un bagad; distribucion de bandièras bretonas (una per 4 sètis); interpretacion de l’imne Bro gozh abans la partida, amb distribucion de las paraulas e projeccion sul grand ecran; presentacion de produits estampilhats Produits de Bretanha.
 
Sol problèma aparegut dempuèi l’acamp: la non-signatura per l’ora de Nantas, probable de pressions d’aqueles que refusan lo restacament del Léger Atlantic a la region Bretanha.
 
Aqueste caminament breton pòt balhar d’idèas als catalans e als occitans? Los Dragons afirman lor catalanitat. A Brutus, se canta ElsSegadors abans cada partida e la presentacion e la marca en francés (e de còps en anglés) es doblada en catalan. Avètz pogut véser lo reportatge de Betevé sus la ligason occitan-XIII a Carcassona.
 




Mas aquò demòra pontual e i a de segur quicòm de faire per dintrar dins una normalitat mai fòrta dels ligams del XIII e de l’identitat occitana. Per nòstra part, mercé a Jornalet, a Ràdio Lenga d’Òc-Narbona e Ràdio Lenga d’Òc-Erau, ensajam d’i contribuir amb aquesta cronica setmanièra.
 
 
E a se veire a l’EOE..
 
Rendètz-vos aqueste dimars 13 d’agost, sul còp de 5 oras del vèspre, a l’Escòla Occitana d’Estiu a Vilanuèva d’Òlt ont vos parlarai de l’istòria del rugbi , de segur, de l’aventura tretzista.
 
 
 
 
Alan Roch