Los panèls del Comtat Venaicin qu’indican los noms de las comunas en occitan demoraràn. Ara lo president del Conselh Departamental de Vauclusa, Maurice Chabert, a cambiat d’opinion après lo braç de fèrre que tenguèt amb los cònsols màgers de las comunas, que defendián aqueles panèls. “Se lei comunas desiran de lei reïnstallar a quauquei mètres dau panèu oficiau en francés, pòdon. E se tenon a lei pausar just en dessota dau panèu en francés, que prengan sei responsabilitats. Es pas lo Conselh Departamentau que lei n’empedirà”, çò ditz lo darrièr comunicat de Chabert.
 
Al començament d’agost, Chabert faguèt tirar qualques panèls en occitan de l’intrada de qualques vilas e vilatges en argumentant que la lei exigís que lo nom oficial de la vila (qu’es solament sa version francizada) siá solet e e que “tot autre panèu (vilatge florit, pargue de Luberon, videosusvelhança...) siga installat sus un autre supòrt”. Mas aquela decision a trobat l’oposicion de nombroses cònsols màgers e de qualques collectius qu’aiman la lenga del país.
 
S’agís de panèls un pauc mai pichons que l’oficial que mòstran, jos lo nom oficial francizat de la vila, lo nom originari e tradicional d’aquelas comunas en provençal escriches amb la grafia de Romanilha que la divulguèt Mistral. Aqueles panèls, las autoritats departamentalas los volián levar dempuèi la fin de 2018, çò rapòrta France 3.