Dins l’Union Europèa, “la guèrra es venguda inconcebabla, mas inconcebabla vòl pas dire impossibla”. Amb aquel avertiment, lo president del Conselh Europèu, Herman Van Rompuy, mercegèt (discors entièr) diluns passat la controvertida atribucion del Prèmi Nobel de la Patz a l’UE. Van Rompuy alertèt qu’“ara que la pièger crisi economica en doas generacions tusta Euròpa, en creant de grandas dificultats a sos ciutadans”, los 27 “afrontan l’enjòc istoric de manténer la patz”. Un vintenat de caps d’estat europèus assistiguèron a la ceremònia de liurament del prèmi Nobel de la Patz dins la grand sala de l’ostal de la comuna d’Òslo.
 
“De parents que luchan per arribar a la fin de mes, de trabalhadors licenciats, d’estudiants qu’an paur que trobaràn pas un primièr trabalh, e mai o ensagen plan: quand pensan a Euròpa, la patz es pas çò primièr que lor arriba al cap”, a admés Van Rompuy. “Son de tempses d’incertitud” e aquel prèmi Nobel de la patz “remembra als europèus la tòca fondamentala de l’Union: l’afrairament entre las nacions europèas, ara e dins l’avenir”, çò defendèt Van Rompuy, en fasent un omenatge als “europèus que somièron a un continent en patz e qu’an trabalhat a cha jorn per qu’aquel sòmi siá realitat”.
 
Lo president de la Comission Europèa, José Manuel Durão Barroso, avertiguèt tanben que “la patz se pòt pas limitar solament a la bona volontat de las gents mas que deu demorar fondamentada per las leis, en respectant los interèsses comuns e en aprigondissent lo sens del futur comun”. Lo conservator portugués defendèt l’èuro coma “un dels simbòls mai visibles de nòstra unitat que podèm trobar en nòstras mans”. “Lo nos cal manténer”,  çò revendiquèt.
 
 
Granda preséncia de caps europèus
 
La ceremònia d’autrejament dels prèmis se debanèt diluns passat en la grand sala de la vila d’Òslo, qu’amassèt una larga representacion de caps europèus, amb los monarcas norvegians, lo rei Harald V, la reina Sònia e los eiretièrs, lo prince Haakon e la princessa Mette-Marit. La delegacion de l’Union Europèa foguèt dirigida pels tres presidents de las institucions europèas: lo president del Conselh, Herman Van Rompuy; lo del Parlament, Martin Schulz; e lo de la Comission, José Manuel Durão Barroso. Al nivèl estatal, la ceremònia comptèt amb la preséncia de la cancelièra alemanda Angela Merkel, del primièr ministre italian Mario Monti, del president francés François Hollande, de l’espanhòl Mariano Rajoy, del bèlga Elio di Rupo e de la danesa Helle Thorning-Schmidt. Participeròn tanben a l’autrejament lo president de la Banca Centrala Europèa, Mario Draghi, e lo vicepremièr ministre britanic, l’europeïsta liberaldemocrata Nick Clegg.
 
 
Lo gèst de Merkel e d’Hollande
 
La ceremònia foguèt una escasença simbolica per la cancelièra alemanda, Angela Merkel, e per lo president francés, François Hollande, de mostrar lor sintonia dins un moment de crisi en Euròpa que los dos caps i defendon de politicas economicas sovent opausadas. Merkel e Hollande, coma representants dels dos estats que s’afrontèron pendent las doas guèrras mondialas, s’aucèron e en se prenent las mans e celebrèron lo prèmi Nobel de la patz per l’Union Europèa.
 
 
De protèstas
 
Lo liurament del Nobel de la Patz a provocat de protèstas de ciutadans que considèran que l’UE merita pas lo prèmi. Dimenge passat, un milierat de personas manifestèron a Òslo contra la cession d’aquel prèmi a l’UE. Los manifestants criticavan que l’UE mantenga lo potencial militar malgrat la crisi economica. “Alfred Nobel diguèt que lo prèmi aviá d’èsser per aqueles que trabalhan pel desarmament”, çò disiá un manifestant dins sos setanta ans.