CAPÇALERA PAIS INVISIBLE

Actualitats

InternacionalPolitica

Hong Kong: enòrma manifestacion per las libertats democraticas

Las protèstas que comencèron en junh passat son reprimidas amb violéncia per la polícia, que se serviriá d’armas fargadas al Reialme Unit

| @EricCheungwc
1,7 milion de personas, segon los organizaires, an manifestat aqueste dimenge per las carrièras d’Hong Kong, per revendicar que se mantengan cèrtas libertats que ten lo govèrn local semiautonòm malgrat la sobeiranetat chinesa. Las protèstas son de mai en mai multitudinàrias e comencèron en junh passat contra la proposicion d’una lei que permetriá l’extradicion devèrs la China continentala de tota persona sospechada de cometre de delictes. De soslinhar qu’en China los jutges son nomenats pel Partit Comunista e los presonièrs an pas cap de garentida de respècte de lors dreches umans.
 
Hong Kong es a viure sa crisi politicosociala pus granda dempuèi que China ne tornèt prene la sobeiranetat en 1997 amb de manifestacions gairebé jornadièras. Mai de dètz setmanas après la primièra manifestacion, los manifestants an pas res obtengut del govèrn local ni mai del chinés. Solament una repression desmesurada.
 
 
Movement pacific qualificat de terrorista
 
La manifestacion d’aqueste dimenge voliá èsser la demostracion que lo movement pròdemocratic d’Hong Kong es un pacific, malgrat las menaças de mai en mai sevèras de Pequin.
 
Los imatges de violéncia qu’arriban d’aquelas protèstas, especialament de la darrièra ocupacion de l’aeropòrt, poirián aver tocat l’imatge pacifista que lo vòl demostrar lo movement, malgrat las qualificacions de terrorisme de part del govèrn chinés. “Los manifestants radicals an emplegat mai d’un còp d’armas per atacar la polícia, çò que constituís en se meteis un delicte criminal fòrça seriós e demòstra tanben l’aparicion dels primièrs signes de terrorisme”, çò diguèt lo govèrn chinés la setmana passada.
 
Los manifestants insistisson, ça que la, per demostrar que lo movement es pacific.
 
 
D’armas fargadas al Reialme Unit
 
La repression policièra es fòrça violenta e se servís d’armas fachas al Reialme Unit, çò denóncia lo pacifista Andrew Smith dins The Guardian. Dins son article, Smith denóncia las granadas de gas CS utilizadas per la polícia contra los manfestants;  tanben precisa que, dempuèi 2015, lo govèrn britanic a autorizat l’exportacion d’armas a Hong Kong per una valor de 8,6 milions de liuras esterlinas (aperaqui 9,43 milions d’èuros) que contendrián de gases lacrimogèns, de bloquièrs antisusmautas, de municions pirotecnicas, una tecnologia d’espionatge e d’autres espleches per reprimir las protèstas popularas.
 
Segon las leis del Reialme Unit, se pòt pas exportar d’armas quand existís un risc clar que serviscan per reprimir lo pòble. Ça que la, Smith denóncia que Londres aja autorizat l’exportacion d’armas malgrat l’emplec clar del gas lacrimogèn contra de manifestants pacifics a Hong Kong.
 
 

 


 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

"Tàrrega" Igualada (PP.CC.)
2.

Això no te aturador, cada cop son mes, coneixent la Xina, fa respecte, crec que els mandataris no tenen mes remei que cedir.
Un Orient amb un Hong Kong castrat, seria molt menys atractiu i menys lliure, no seria el mateix.
Per això cal que els que menen pensin i pensin be, al va molt.
Que se'n surtin, la democràcia no es cap mal, de que em sona això!?
visca la Terra...Lliure!
LÈrnest,"El Tàrrega".

  • 0
  • 0
Francesc palma
1.

Se poden demandar pacificament melhoras democràticas. Mas res pus.

  • 3
  • 2

Escriu un comentari sus aqueste article