Superliga: mas ont son passats los catalans?
 
La partida dels Dragons aqueste dissabte a Brutus contra los darrièrs de la competicion, los Cavals Fòls de Londres, foguèt lo rebat d'una sason mancada: manca de solidaritat, passas dins lo voide, aproximacions defensivas, jòc al pè sens eime, liberacions de palmas fantasierosas, palmas rendudas a l'adversari, cadenas de tengut pas menadas a bon tèrme, jogaires nafrats... L'entraïnaire McNamara arriba pas a faire fisança als joves e los Sang e Aur presentan una de las esquipas mai vièlhas de la competicion. Los Sang e Aur dominèron, mas, amb una penalitat e un ensag de 90 mètres, Londres menava la pausa: 8-0. Se Williame entretenguèt l'espèr d'un retorn amb un ensag a la represa, los angleses, sens engenh mas metodics e aplicats, ajustèron un ensag transformat, una penalitat e un tombat per s'impausar 17-4. Aqueste còp n'es acabat dels espers catalans de qualificacion per las pelhòfas. De son costat, Salford que vòl èsser del nombre va ganhar a Hull-FC: 44-22, coma Castleford que domina Huddersfield: 24-0.
 
Sòrt diferent pels dos finalistas de la Cup: St Helens va ganhar a Leeds 36-20, alara que los Lops de Warrington pèrdon a Wigan: 20-6.
 
 
Lo prince Harry a Wembley
 
La Rugby League anóncia la preséncia del prince Harry a Wembley per presidir la finala de la Cup d'aqueste dissabte 24 d'agost de vèspre entre St Helens e Warrington. Estatutàriament, lo prince ten lo ròtle onorific de “patron de la Rugby League”.
 
S'avètz pas lo temps d'anar a Londres, de segur seguiretz la retransmission prevista de la partida sus BeInSport (n° 6).
 
Profeitatz-ne, que la cadena ven de senhalar qu'arrestariá la difusion dels rescontres de Superliga a la fin de la sason per de rasons budgetàrias de mal comprene (vist çò que lor còsta la difusion del XIII per rapòrt a la moneda qu'escampan pel fotbòl). Contunharà per contra la difusion de las partidas australianas, dins la mesura ont l’NRL balha a gratis los dreits de retransmission.
 
 
Entenduda cordiala a Tolosa
 
Lo president de l'Estadi Tolosan (lo club istoric e emblematic del 15) ven d'anonciar que lo Tolosa Olimpic poiriá jogar sas partidas de Championship o (se monta) de Superliga a l'estadi Ernest-Wallon tre la sason venenta.
 
En dominant Batley 46-0, lo Tolosa Olimpic assegura sa plaça dins los cinc qualificats per la fasa finala del Championship. Lo primadièr, Toronto, bat Rochdale sus la meteissa marca de 46-0.
 
 
NRL: la batèsta contunha per la qualificacion
 
En Austràlia, se jogava la 22a jornada de la fasa de classament (que ne compòrta 25 en tot). Canberra va ganhar cò del cap de fila Melbourne 22-18. La batèsta demòra bèla entre 5 formacions per dintrar cò de las darrièras doas plaças (la 7a e la 8a) qualificativas entre Brisbane (23 punts), Cronulla e Penrith (22 punts), Newcastle e los Tigres (20 punts, www.nrl.com).
 
 
Un libre bèl per comprene lo XIII del país
 
Danís Arcàs, tretzista afogat que comenta dempuèi d'ans partidas sus las ondas de Radio-Marseillette, ven de publicar un libre bèl de 540 paginas en format A4: Rugby à XIII: Il était une fois le rugby de liberté. Tome 1: 1933-1941, de la naissance à l'interdiction.
 
L'autor a furgat dins los archius, la premsa locala e esportiva de l'epòca per contar pel menut la debuta e l'espelida bèla del XIII en França aprèp la partida Anglatèrra-Austràlia del 31 de decembre de 1933 a París que menarà a la virada dels 17 Galia's boys en Anglatèrra. Al retorn dels jogaires, van nàisser de formacions de 13, de clubs de 15 van rejónher lo movement e lo XIII se desenvolopa, amb vam e estrambòrd, de Bordèu a Lion, de Vilanuèva d'Òlt a Carcassona, del País Basco a Tolosa, de Perpinhan a París, d'Albi a Roana amb de clubs professionals e tanben amators. Las competicions (campionat, Copa) se meton en plaça. Lo XIII de França rescontra Anglatèrra, País de Galas, Austràlia...
 
Lo XIII es plan mai espectaclós qu'un XV fòrabandit del Torneg de las 5 Nacions pels britanics: de milierats d'espectators seguisson las partidas del nòuvengut que se truca al conservatisme dels responsables de l'espòrt en França.
 
Danis Arcàs torna sus 800 partidas jogadas fins a la prima de 1940 abans de n'arribar al temps de l'interdiccion pel regim de Pétain. Se torna trapar aqueles noms que fan somiar: Galia, Rousié, Bergèze, Noguères e plan d'autres.
 
Una lectura indispensabla per comprene non solament l'istòria del XIII mas tanben lo ressentit actual a respècte de nòstre espòrt. De segur, s'espèra la seguida d'aquel trabalh monumental qu'èra indispensable de menar (qual prendrà l'iniciativa d'un Musèu del XIII per remosar documents, malhòts, afichas, imatges filmats o televisats,etc. ?)
 
Lo libre: 37 èuros; per lo comandar, contactar dirèctament: arcasdenis2@gmai...
 
 
 
 
Alan Roch