Lo Reialme Unit quitarà l’Union Europèa lo 31 d’octòbre que ven, que i aja o non un acòrdi. Lo primièr ministre Boris Johnson a signat l’òrdre de desconnexion. Ara, un rapòrt confidencial del quite govèrn britanic avertís qu’un Brexit sens acòrdi portariá de problèmas. Aquel rapòrt, que lo revelèt dimenge passat The Sunday Times, prevei que i aurà de problèmas amb lo provesiment dels carburants, de la noiridura e dels medicaments.
 
Segon aquel document, se lo 31 d’octòbre lo Reialme Unit quita l’UE sens acòrdi, i aurà tornarmai de frontièras amb de doanas e, per tant, amb de contraròtles frontalièrs que provocaràn de retards importants sus l'85% dels camions que van de França a Anglatèrra. Aquò reduirà l’importacion del manjar fresc e farà pojar los prèses. D’autre latz, la frontièra amb la Republica d’Irlanda pausarà tanben de problèmas.
 
Tot comptat e rebatut, lo rapòrt conclutz que lo Reialme Unit patirà de caumas e de protèstas que mobilizaràn fòrça policièrs.
 
Per ara, lo govèrn britanic a pas contestat l’existéncia d’aquel rapòrt, mas lo ministre de l’energia a assegurat que tot es previst per poder quitar l’UE sens acòrdi lo 31 d’octòbre que ven.
 
 

The Sunday Times has obtained a copy of the government's classified 'Yellowhammer' report on the chaos expected after a no-deal Brexit. Find out how Whitehall is preparing for food and medicine shortages, transport disruption and civil unrest in our comprehensive coverage. pic.twitter.com/UwDmCUtsbt

— The Sunday Times (@thesundaytimes) August 17, 2019