Comença uèi a Pau lo festenal Hestiv’Òc. Fins a dimenge venent, la musica, la dança, los espòrts, lo cinèma, lo teatre, las tradicions, los jòcs, la literatura, lo cant e las danças tornaràn èsser los protagonistas de la capitala bearnesa pendent quatre jorns. Aquel festenal es un rendètz-vos cultural occitanista obligatòri de cada estiu, e es organizat per l’associacion Accents del Sud.

Coma d’abitud, una impressionanta cantèra inaugurarà uèi la 15a edicion del festenal Hestiv’òc. De milièrs de festivalièrs cantaràn ensems a 19h, dins l’estadi Tissié de Pau, en inaugurant un festenal de quatre jornadas qu’aduirà de fèstas pels enfants, de concèrts, d’estanquets de restauracion, d’espectacles en vila... Fins a dimenge que ven, la capitala de Bearn serà un còp de mai lo caireforc de las culturas occitanas. La 15a edicion del festenal Hestiv’òc ten ongan mai de 30 grops e companhiás vengudas dels quatre cantons d’Occitània e tanben d’Aragon, del.Bascoat e Catalonha.
 
Hestivòc nasquèt en 2005 a partir de l’iniciativa volontària d’Accents del Sud. Aquela organizacion culturala a un vintenat de personas benevòlas qu’arriban d’èsser 80 pendent los jorns del festenal. La division dels prètzfaches en còlas de trabalh es la clau del succès de l’associacion. Cal cercar l’origina del Hestiv’Òc en l’an 2003, quand dos sòcis fondadors constatèron lo succès del Festenal Interceltic de la vila bretona d’An Oriant. Dich e fach. Un an puèi, creèron, amb d'autras personas motivadas, l’associacion Accents del Sud amb la tòca d’impulsar un festenal cultural, que vegèt ansin lo jorn en 2005.
 
Lo festenal se caracteriza tanben per una actitud responsabla e solidària. I a una atencion especiala per las personas amb de problèmas de mobilitat; en mai d’aquò, los organizaires ensajan de velhar qu’una granda part del material emplegat siá reciclable e que los participants partegen lors veituras per congestionar pas la vila. Coma totjorn, totes los espectacles son gratuits e destinats al public familial.
 
Podètz trobar tota l’informacion e lo programa del festenal aicí, sul sit web del Hestiv’Òc, e mai, malaürosament, siá sonque en version francesa.