CAPÇALERA PAIS INVISIBLE

Actualitats

InternacionalPolitica

Itàlia: a demissionat lo primièr ministre en anonciant la fin de son govèrn

Dins una compareissença al Senat, Giuseppe Conte a acusat Matteo Salvini d’irresponsabilitat

| @RepubblicaTv
Lo primièr ministre d’Itàlia, Giuseppe Conte, a demissionat aqueste dimars en anonciant la fin de son govèrn de coalicion entre lo Movement 5 Estelas e la Liga. Dins una compareissença al Senat, Conte a criticat lo ministre de l’Interior Matteo Salvini en lo qualificant d’irresponsable. “Salvini a seguit d’interèsses personals e de partit”, çò a dich en referéncia a la mocion de censura que lo ministre d’extrèma drecha presentèt contra Conte l’8 d’agost passat. E mai a reprochat al M5E de se daissar influenciar per la Liga.
 
L’anóncia del primièr ministre es lo darrièr capítol d’una crisi de govèrn que comencèt quand Salvini anoncièt la rompedura dels dos partits del govèrn, presentèt la mocion de censura e reclamèt d’eleccions anticipadas.
 
Segon Conte, “quand una fòrça politica seguís unicament son interès electoral, met en perilh non solament la noblesa de la politica, mas tanben los interèsses nacionals de tot lo país”.
 
“Los eveniments d’aquestas oras requerisson qu’interrompa l’experiéncia del govèrn aicí. Anarai en çò del president de la Republica per metre entre sas mans ma demission”, çò a precisat Conte. Per tant, Sergio Mattarella deurà tre ara consultar los diferents caps politics per veire se i a la possibilitat de formar un govèrn alternatiu o, dins lo cas contrari, avançar las eleccions, çò que desira Salvini. De soslinhar que las darrièras eleccions legislativas se tenguèron en març de l’an passat.
 



 
 
 
 




Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: PUBLICITAT

Comentaris

francesc palma
1.

Tornar los migrants a ca seva. Prou de donar vots als fachas italians.

  • 3
  • 7

Escriu un comentari sus aqueste article