Lo Bas Ador e lo Bascoat Nòrd son, dempuèi mai d’una setmana, de païses preses per la polícia. La rason es que Biàrritz aculhirà, tre dissabte venent, la reünion del G7 amb los caps d’estat de las principalas poténcias industrialas, del temps que s’anóncia en Bascoat un eveniment alternatiu de contrainformacion e protèsta organizat per de movements socials bascos e de pertot. Dètz mila gendarmas i son mobilizats, segon lo ministre francés de l’Interior, Christophe Castaner, qu’a blindat l’accès a tota la zòna ont se tendrà la cima. Los abitants e los emplegats d’aquel quartier se devon identificar per i intrar. E mai l’estat espanhòl a mobilizat un milièr d’agents sus la frontièra politica que travèrsa lo Bascoat. Tant l’estat espanhòl coma lo francés an desplegat de dispositius antisusmautas per reprimir de protèstas.
 
Entre dissabte e diluns que ven se debanarà la reünion del G7 qu’i jonhon los caps d’estat o de govèrn dels Estats Units, de Canadà, França, Alemanha, Japon, Itàlia e del Reialme Unit, amb los presidents del Conselh Europèu e de la Comission Europèa. La cima aculhís ongan los representants d’Espanha e de Chile coma convidats especials. Russia participa pas pus a aquelas reünions, car ne foguèt expulsada après l’annexion de Crimèa.
 
 
La contracima
 
Un centenat d’organizacion politicas, de partits, de sindicats e de movements socials del Bascoat, d’Occitània e d’endacòm mai an organizat un eveniment alternatiu a unes 30 quilomètres de Biàrritz, a Hendaia e Irun, çò es d’un costat e de l’autre de la frontièra administrativa que travèrsa lo Bascoat. Demest las organizacions participantas i a Libertat, que durant las darrièras setmanas a organizat d’eveniments a Pau per informar de la reünion del G7 e de la contracima.
 
“Sabèm que las politicas que las pacharàn dins la reünion seràn las pus ultraliberalas possiblas, que son las que crèan las inegalitats e que meton la planeta en perilh. Per aquela rason, la contracima èra absoludament necessària”, çò dison los organizaires de la contracima, que sa tòca es d’analisar l’efièch que produson las politicas dels govèrns dels grands estats, e de prepausar d'alternativas per obténer de cambiaments reals.
 
Los participants deuràn suportar una pression policièra desmesurada. “An bunkerizat tota la còsta basca”, çò explica una pòrtavotz de la plataforma “G7 Ez” (çò es “G7 non”, en basco). Denóncian un contraròtle extrèm del govèrn francés e mai planhon que lor ajan pas permés d’utilizar cap d’esquipament public.
 
 
Dialòg de las nacions sens estat
 
Lo programa prevei, entre uèi e deman, un centenat d’activitats a l’entorn de sèt aisses politics: l’anticapitalisme, l’ecologisme, lo feminisme, la descolonizacion, la democracia, lo pacifisme e l’antiimperialisme e la liura circulacion de las personas. De soslinhar la conferéncia entitolada “Dialòg entre las nacions sens estat” que comptarà sus la participacion de la politiciana catalana exiliada Marta Rovira, del representant d’EH Bildu Arnaldo Otegi, e del president de l’Assemblada de Corsega, Jean-Guy Talamoni, entre d’autres.
 
 
Situacion de las lengas ignoradas e mespresadas
 
Tanben deman es previst que se tracte las realitats qu’i fan fàcia al quotidian los locutors de las lengas minorizadas coma los occitans, los bascos, los mapuches, los amazighs, los curds... Delà los testimoniatges, se prevei de corses per devenir poliglòta en una ora, s’enregistrarà un tèxt dins tot plen de lengas e se cantarà de rap en totas las lengas possiblas del public.
 
 
Manifestacions
 
Dissabte venent, jorn que començarà la reünion del G7, se farà una manifestacion. Lo cortègi partirà d’Hendaia e anarà devèrs Irun en traversant la frontièra administrativa.
 
Dimenge, son convocats divèrses acamps pacifics a l’entorn de Biàrritz.
 

#ContreG7 : Toutes et Tous ensemble pour construire un autre monde, solidaire et et respectueux de l'humain et de la planète@CerveauxNon@davduf@T_Bouhafs@bizimugi@AlterG7Metz@G7ezplataforma@G7fanclub1@AnvCop21@CPLCFrance@cop21montaigu@reseau_ritimo@radioparleurpic.twitter.com/fCt2yJi1uj

— Alternatives G7 (@AlternativesG7) July 1, 2019

 
 
La reünion del G7
 
Lo G7 aculhirà la primièra reünion entre lo primièr ministre del Reialme Unit, Boris Johnson, e lo president estatsunidenc, Donald Trump. Johnson espèra de sarrar sas relacions amb Trump, compte tengut del Brexit dur anonciat per la fin d’octòbre.
 
D’autre caire, cal veire qual representarà Itàlia après la demission del primièr ministre, Giuseppe Conte, en seguida de la crisi politica provocada per Matteo Salvini.
 
Un dels tèmas principals que los dirigents mondials auràn sus la taula serà l'instabilitat economica mondiala. Angela Merkel fa partida dels principals caps concernits, puèi que la banca centrala d’Alemanha ven d’avertir que l’economia d’aquel país pòt intrar en recession lèu-lèu a causa de la davalada de las exportacions industrialas. L’economia mondiala es tanplan tocada per la guèrra comerciala entre los Estats Units e China.
 
L’urgéncia climatica es un autre subjècte que los caps de las poténcias mondialas auràn sus la taula.