An tornat dobrir la plaja de la Mirandòla après un incident de pollucion provocada per la residéncia que lo rei de l’Arabia Saudita i ten aquí, al golf Joan, dins la comuna de Valàuria (Vencenc). L’ostal dich del rei Fahd ten una petita estacion de relevacion d’aigas residualas. Mas a causa de la nauta frequentacion es estada saturada e las sobras se son deversadas dins lo valon. La plaja la barrèron dimenge passat de ser e la netegèron durant dos jorns.
 
“Suez es intervengut sus lo terren per estudiar lo ret que monta ben aut dins lo valon. Per remembrança, agueriam una problematica amb una coproprietat pus aut fa dos ans. Mai dins aquest cas, s’avèra que l’origina n’es la proprietat saudiana”, çò a dich lo cònsol màger de Valàuria a Nice-Matin. “L’estacion es a l’arrèst. La vila aculhís pus d’ocupants”, çò precisa l’elegit en precisant que los trabalhs seràn assumits pels proprietaris de la residéncia.
 
De remembrar que la residéncia del rei saudita faguèt polemica en 2015 quand se faguèt embarrar la plaja publica de la Mirandòla, e i volguèt quitament bastir un ascensor en ocasionant un versament de beton.