Lo ministre dels afars exteriors d’Iran, Mohammad Javad Zarif, aterrèt ièr dimenge a l’aeropòrt de Biàrritz a l’ocasion de la reünion del G7. Zarif i èra anat en responsa a l’invitacion de son omològ francés, Jean-Yves Le Drian. Amb aquel convit, Le Drian cèrca de contunhar l’iniciativa de l’estat francés per minimizar las tensions al golf Persic e tornar prene lo dialòg diplomatic amb Iran.
 
Coma òste de la reünion, lo president francés, Emmanuel Macron, anoncièt als autres dirigents dels païses industrializats l’arribada del ministre iranian, çò qu’estonèt lo president estatsunidenc Donald Trump. Pus tard, Macron diguèt als mèdias que totes los membres del G7 s’èran engatjats per l’estabilitat de la region.
 
Iran e los Estats Units travèrsan un moment d’extraordinària tension diplomatica après que Trump se retirèt unilateralament de l’acòrdi nuclear signat amb Iran en 2015 e restaurèt las sancions prèviament suspendudas gràcias a un pache qu’aviá replaçat la republica islamica dins los mercats internacionals.
 
Dempuèi alavetz, los dos païses son estats protagonistas de nombroses episòdis de friccion, coma l’abatatge d’un dròne estatsunidenc en junh passat que presumidament subrevolava l’espaci aerian d’Iran.
 
 

Iran's active diplomacy in pursuit of constructive engagement continues.

Met @EmmanuelMacron on sidelines of #G7Biarritz after extensive talks with @JY_LeDrian & Finance Min. followed by a joint briefing for UK/Germany.

Road ahead is difficult. But worth trying. pic.twitter.com/oXdACvt20T

— Javad Zarif (@JZarif) August 25, 2019