L’an passat, Warrington s’èra dit qu’es pas una tropelada de catalans aganits que los empacharián de tornar menar la Cup dins lor vila. Mas lo vam catalan passèt per aquí e lo trofèu s’envolèt per Perpinhan.
 
Ongan, a Wembley (60 000 espectators), la finala opausava Saint Helens, qu’a perdut solament tres partidas dempuèi la debuta de la sason, e Warrington, que demorava sus cinc desfaitas de tira. Tres còps ongan, los Sants avián batut los Lops.
 
Se los Sants dintrèron coma cal dins la partida, puèi se vesián refusar (sens apèl al vidèo) un ensag valable, las fautas de man e las aproximacions se paguèron car. Aprèp una marrida recepcion de l’arrièr, sus la cadena seguenta, Warrington marcava lo primièr ensag (Philbin, 26a), abans de tornar darrièr la linha cinc minutas mai tard (Murdoch-Masila, 33a). Amb las transformacions de Rachford, los Lops menavan 12-0 a la pausa.
 
A la represa, St Helens ensagèt plan de se tornar metre a l’òbra per capvirar la situacion. Lo catalan Théo Fages fasiá levar los sostens dels Blanc e Roge amb un ensag (57a) que l’arrièr Coote ne mancava pietosament la transformacion: un acte mancat de mai que s’ajustava a las 16 errors de mans dins la partida per una formacion empruntada e en manca d’imaginacion. Amb un despart al ras del tengut, lo talonaire Clark (nomenat òme de la partida) puntava un tresen ensag pels Lops (72a), ensag que levava definitivament tot suspens sul venceire del rescontre. Victòria de Warrington: 18-4. Saint Helens se va mobilizar per ganhar la Superliga. D’en primièr, lor i caldrà se desbarrassar d’aquela marrida tissa: la paur de ganhar las partidas decisivas!
 
En seguida, Sheffield emportava la primièra Cup dedicada a las formacions del Championship amb una victòria suls Viquings de Widnes: 36-18.
 
L’an que ven, la finala de la Cup se tendrà lo dissabte 18 de julh, a mièg camin entre la finala de Wimbledon e la dobertura dels Jòcs Olimpics de Tòquio.
 
 
Cap a las pelhòfas
 
Dissabte, en Superliga, darrièra partida de la sason a Brutus pels Dragons amb la recepcion d’Hull KR en luta per evitar la davalada en Championship. Se pòt esperar una victòria e una bona prestacion dels Sang e Aur, que, ça que la, faràn pas doblidar la non-qualificacion per las pelhòfas (levat un improbable miracle) e se demorarà sens responsa sus las rasons d’una sason mancada.
 
De son costat, en Championship, dissabte a Blanhac (15h30), lo Tolosa Olimpic voldrà confirmar sa segonda plaça al classament fàcia a Dewsbury.
 
 
NRL: encara quatre per doas plaças
 
En Austràlia (www.nrl.com), quatre formacions demòran en corsa per s’autrejar las darrièras doas plaças qualificativas: Cronulla (24 punts) e Brisbane (23 punts) perseguits pels Tigres e per las Pantèras (22 punts).
 
Darrièr Melbourne e los Poletons, quatre autras esquipas son en batèsta per dintrar dins lo naut del tablèu que balha lo dreit a una desfaita dins lo primièr torn de las pelhòfas: Canberra e los Lapinons (30 punts), Manly e Parramatta (28 punts).
 
Caldrà doncas seguir de prèp lo verdicte de las partidas Brisbanz-Parramatta, Manly-Melbourne, Cronulla-Canberra, Polets-Pantèras... De tot biais, es pas complicat: totas las partidas d’NRL son interessantas de seguir!
 
 
 
 
Alan Roch
 

 
<a href="https://www.facebook.com/jornaletsolidari/" target="_blank"><img alt="" src=" https://www.jornalet.com/imatges/images/3mesi.jpg" style="width: 561px; height: 246px;" /></a>