Setembre, temps de rintrada: aquò es plan una vertat pels rendètz-vos culturals prepausats en país d’Aude aqueste mes e a la debuta d’octòbre, una bona lançada per la sason 2019-2020 entre cants (festenal polifonic de la nauta val d’Aude), escritura e conferéncias (los 4 Dijòus-Escritura), lo conte e la reflexion (Jornadas dels Companhs de Paratge) e lo teatre (Mais où est passée ma vigne?).

Se canta... en nauta val d’Aude
 
Coma cada an, lo grop vocal d’Esperasan, lo GESPPE , prepausa un programa de tria pel Festenal de Polifonias en nauta val d’Aude, amb de recitals plan occitanizats ongan.
 
La dobertura se debanarà aqueste divendres 30 d’agost en la glèisa de Rovenac amb lo trio Albada que vòl establir de ligams entre ièr e uèi. Pascal Caumont, membre del grop, animarà un estagi de cant (ja complet) lo dissabte 31 d’agost a Esperasan. En serada, a l’Espaci Catar de Quilhan, lo grop lengadocian Lo Barrut serà sus l’empont amb son repertòri de composicions originalas.
 
Lo festenal tornarà prene d’ample per la fin de la setmana seguenta, amb doas seradas e una vesprada:
   
 
Rescontres amb l’escrit occitan
 
En aqueste mes de setembre, l’IEO-Aude vos convida a quatre rendètz-vos consacrats a l’escritura occitana: poesia, pròsa, jornalisme, reflexion. Los rescontres se debanaràn a l’Ostal Sirventés (79, la Trivala a Carcassona), los dijòus a 6 e mièja del vèspre (dintrada liura).
 
Primièr rendètz-vos lo dijòus 5 septembre amb Ramon Ginolhac qu’a coordenat l’edicion de Còr d’Occitània, una antologia dels autors occitans de Tarn (romans, novèlas, poèmas, cançons...) de 1882, annada de la venguda de Frederic Mistral a Albi, fins ara. Atal, un centenat d’autors, femnas e òmes, son presentats.
 
Segond rendètz-vos lo dijòus 12 de setembre amb Estefan Linou que ven de publicar Résilience alimentaire et sécurité nationale per noirir la discussion sus la necessitat dels circuits corts e tanben sus la redescobèrta necessària dels sabers populars perduts en s’apiejant sus son experiéncia “locavòra”.
 
Tresen rendètz-vos lo dijòus 19 de setembre amb Ferriòl Macip, animator, dempuèi 7 ans e dempuèi Barcelona, lo jornal quotidian en occitan sul Net: Jornalet. L’escasença de faire lo punt sus la premsa occitana d’informacion e d’opinion e sus sas perspectivas.
 
Lo dijòus 26 de setembre, Maria-Joana Verny vendrà parlar de la poesia contemporanèa dins las lengas de França (alsacian, basc, breton, catalan, còrs e occitan) en s’apiejant sul libre Par tous les chemins, un florilègi de textes qu’a recampats amb lo poèta còrs Norbert Paganelli.
 
 
Los arbres e nosautres
 
A la debuta d’octòbre, los Companhs de Paratge e l’IEO-Aude organizan dos rendètz-vos sul tèma de l’arbre, un subjècte que se trapa d’actualitat amb los questionaments sus las biodiversitat e los incendis qu’an tocat Corbièras coma Amazonia.
 
Lo divendres 4 d’octòbre, a Cavanac (20h30, sala de las fèstas), lo contaire de Peiregòrd Danièl L’Homond contarà Parfois les arbres, ont met endavant las relacions estreitas entre l’uman e lo vegetal.
 
L’endeman dissabte 5 d’octòbre, es dins l’abadiá de Sant Ilari que los Companhs de Paratge convidan a lor jornada annala de reflexion: Josiana Ubaud parlarà dels arbres-totèm; Miquèla Stenta de la plaça dels arbres dins l’imaginari de Lemosin (Marcela Delpastre, Micheu Chapduelh; …); Eric Fabre tornarà sul comèrci de la fusta als sègles XVII e XVIII en Aude; i aurà tanben un agach sus l’actualitat silvèstra locala e mondiala. Dins aquesta jornada ont las questions se veson jols angles istoric, etnologic, ecologic, economic, social…
 
 
Quina viticultura deman?
 
La pèça de la Companhiá GargamèlaMais où est passée ma vigne ? serà presentada lo dimenge 13 d’octòbre, a 5 oras del vèspre, al… Teatre dins las Vinhas (Cornèsa-Confolens) . La pèça, escrita per Anneta Clément, vira a la discussion entre un paire que vòl vendre las darrièras tèrras e sa filha que las vòl gardar e se convertir a l’agricultura biologica. L’occitan es present dins los dialògs e per las cançons del trio Perrina Alranq, Isabèla François e Joan Hebrard.
 
E apuèi…
 
E apuèi serà temps de preparar (e de prene part a):
   
 
 
 
Alan Roch