Arron la reedicion en 2009 de Belina, lo cap d’òbra de Miquèu de Camelat, la joena colleccion Honts de las edicions Reclams que persegueish lo son tribalh de reedicion de classics de la literatura nosta.
 
Aqueste còp, que prepausa ua novèla, Ua vengença, publicada peu prumèr còp per Jan Victòr Lalana en 1899.
 
Lahontan, a la termièra deu Bearn e de la Shalòssa. Qu’èm en 1793. Zabelina que s’ei pensada negar, mes Menin, un joen pescador, que l’a tirada de dangèr, e la gojata qu’ei caduda amorosa deu son sauvador.
 
Qu’avem dens aquesta novèla tots los ingredients d’un drama romantic qui’s devira conte e se clava de la mei rocambolesca faiçon…
 
Hornitz-i la lenga utilizada per l’autor, presada e mei qu’aquò entorteligada, e que compreneratz quin Ua vengença e pòt estar ua òbra unica dens la literatura gascona.
 
L’autor, Jan Victòr Lalana (1849-1924) qu’ei un deus principaus obrèrs deu prumèr periòde deu Felibritge gascon. Que participè a la creacion de l’Escole Gastoû-Febus en 1896, e que s’impliquè de mei en mei dens la soa direccion, com secretari, puish com capdau de 1919 a la soa mort.
 
La mesa en grafia classica de l’òbra qu’ei estada hèita per Eric Gonzales, qui s’ei cargat tanben deu prefaci, deu las nòtas e de la traduccion.
 
 
 
 
Eole Bog Vetrova
 
 
 
 
_____
LALANA, Jan Victòr. Ua vengença. Reclams, 2au edicion, 2012. 130 paginas. 8 èuros.