Un an de mai, l’independentisme catalan prepara sa granda manifestacion de l’11 de setembre, a l’escasença de la fèsta nacionala de Catalonha, la nomenada Diada. Compte tengut dels eveniments de las darrièras annadas, se prevei que mai d’un milion de personas tornen prene las carrièras de Barcelona per exigir l’independéncia, la republica e la democracia. Ongan, l’Assemblada Nacionala Catalana (ANC) compta sul sosten d’autras associacions coma Òmnium Cultural e l’Associacion dels Elegits per l’Independéncia. Lo lèma d’ongan es “Objectiu independéncia”, amb lo qual los organizaires demandan als politicians que sián capables de se metre d’acòrdi fàcia a la tòca comuna de l’independéncia, quina que siá l’ideologia de cadun.
 
En aquesta ocasion, la manifestacion tendrà per ponch central la Plaça d’Espanha de Barcelona. “Avèm cercat una plaça bèla ont confluiscan de grandas carrièras, perque volèm representar qu’a partir de camins desparièrs i a un ponch de confluéncia qu’es l’independéncia”, çò diguèt la presidenta de l’ANC, Elisenda Paluzie, quand presentèt l’eveniment als mèdias. Per tant, es previst que las cinc carrièras que s'acaban sus aquela plaça sián plenas de manifestants. Amb aquel imatge vòlon dessenhar l’union devèrs una tòca centrala.
 
Coma d’abitud, la manifestacion començarà a 17h14, en memòria de l’an 1714 quand Barcelona tombèt jos l’armada francocastelhana e Catalonha perdèt son independéncia. L’ANC recomanda d’èsser aquí una ora abans. En mai d’aquò, s’organizarà una fièra de consum estrategic de produches, espleches e servicis del país.
 
 
Occitans al tròç 20
 
Es important que lo mond que i participaràn s’inscrigan per garentir la distribucion equitabla dels manifestants sus tot lo percors. Es previst que los participants de la Val d’Aran sián inscriches sul tròç 20, e doncas es recomandable que los autres compatriòtas sortits de pertot en Occitània se marquen sul meteis tròç 20. Atal i aurà una polida concentracion de bandièras e bandeiròlas occitanas e en occitan que remembraràn que se la nòva republica conten Catalonha e Aran, serà un estat binacional occitanocatalan.
 
Òm se pòt inscriure sul sit diada.assemblea.cat e tanben pel telefòn +34 93 655 82 82. Per de questions, podètz mandar un e-mail a dubtes11s(a)assemblea.cat.
 
 
Politicians defòra
 
Ongan, l’ANC a decidit de daissar los politicians fòra de la zòna dels convidats. Atal vòlon mostrar lor malèsser davant la manca d’unitat estrategica dels partits independentistas après los paches electorals de las darrièras eleccions municipalas.
 
Pasmens, si que i aurà una granda representacion dels collectius represalhats. L’idèa es de sosténer mai que mai las organizacions de la societat civila que, malgrat la repression desproporcionada de l’estat espanhòl, contunhan d’agir amb dignitat sens renonciar a l’independentisme.