capçalera campanha

Actualitats

Internacional

Papoa Occidentala: d’independentistas an assautat una preson en liberant los presonièrs politics

La region, ocupada per Indonesia dempuèi 1963, viu una setmana de protèstas

| @BennyWenda
De centenats de manifestants independentistas papós assautèron dijòus passat una preson a Jayapura, la capitala de la region indonesiana de la Papoa Occidentala, dins l’illa de la Nòva Guinèa, çò rapòrtan de mèdias locals. Participavan a una manifestacion en favor de l’independéncia d’aquela region, contra lo racisme de la polícia indonesiana e en protèsta per la mòrt, lo jorn precedent, de dos civils.
 
En aprofechant la situacion de caos e d’afrontaments amb la polícia, los manifestants ataquèron la preson d’Abepura, ont èran embarrats qualques unes dels presonièrs politics papós. Mai de 250 personas aurián fugit aquela preson.
 
L’estat indonesian a talhat las comunicacions dins la region, que veniá de viure una setmana de protèstas. Segon Al Jazeera, lo bilanç es de sèt mòrts, dont sièis manifestants e un soldat.
 
Las manifestacions comencèron après que se foguèt sauput que, lo 17 d’agost, las autoritats avián detengut 43 estudiants papós dins la vila de Surabaya, dins l’illa de Java, per la destruccion d’una bandièra indonesiana lo jorn de l’independéncia. En seguida d’aqueles faches, divèrses estudiants se fortifiquèron dins lors dormitòris e la polícia lor auriá tirat de gases lacrimogèns mentre que cridava de paraulas racistas.
 
 
Ocupada per Indonesia dempuèi 1963
 
Las organizacions independentistas de Papoa Occidentala —tant las associacions pacificas coma los grops armats— patisson despuèi de decennis la persecucion politica, militara, judiciària e policièra de l’estat indonesian.
 
Anciana colònia neerlandesa, la Papoa Occidentala foguèt envasida per Indonesia en 1963 e annexada formalament en 1969, après un referendum ont sonque se permetèt la participacion d’un milièr de personas. Los independentistas argumentan que la Papoa Occidentala foguèt pas jamai descolonizada formalament e que, per tant, caldriá organizar un referendum d’autodeterminacion sul territòri.
 
 
 
 
 
 
 
 



 

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris


I a pas cap de comentari

Escriu un comentari sus aqueste article