Cinquanta dos deputats de l’Assemblada de França, dicha nacionala, de sièis grops politics desparièrs —de l’esquèrra al centredrecha— an publicat una letra que demanda la fin de la repression espanhòla contra Catalonha. Los deputats dison qu’an aguda l’intencion d’interferir pas dins la situacion dels presonièrs politics e dels exiliats, e per aquela rason an esperat la fin dels periòdes electorals per rendre publica lor letra.
 
Dins aquesta, publicada dissabte dins Le Journal du Dimanche, los deputats dison: “Uèi, volèm simplament dire nòstra preocupacion e nòstra reprobacion envèrs çò que sembla atacar las libertats fondamentalas e l’exercici de la democracia”. E mai planhon que “lo debat politic” siá “talhat per la repression”. Dins aquel sens precisan qu’aqueles elegits catalans son encarcerats e exiliats “en rason de lors causidas politicas, per aver volgut organizar un vòte”, e que “riscan d’èsser condemnats a de pesugas penas de preson”. Enfin, los signataris cridan a “l’apasiment de las tensions e a la fin de las mesuras arbitràrias que frapan d’elegits del sufragi universal”.
 
Demest los signataris i a lo president del partit de centre liberal UDI Jean-Christophe Lagarde, lo secretari general del partit comunista francés, Fabien Roussel, o lo cap de La França Insomesa, Jean-Luc Mélenchon. I a tanben d’èx-ministres d’esquèrra coma Marie-George Buffet, que foguèt candidata a la presidenciala pels comunistas, o Sylvia Pinel, que participèt al govèrn d’Ayrault. Vaicí la lista completa dels signataris:
   
Es pas lo primièr còp que d’elegits franceses denóncian la repression en Catalonha. En març passat, 41 senators de totes los partits apelèron al “respècte de las libertats e dels dreches fondamentals en Catalonha” dins una peticion per que França e los païses de l’Union Europèa intervenguèsson per restablir las condicions del dialòg e trobar de solucions politicas a un problèma politic.