Dissabte passat, Hong Kong commemorava lo cinquen anniversari del Movement dels Parapluèjas, la primièra revolucion democratica que la visquèt aquela ciutat. A l’ocasion de l’eveniment se cridèt a una manifestacion mas lo govèrn de la vila l’enebiguèt e, qualques oras abans, faguèt arrestar nòu caps del movement social que representan lo larg espèctre de la darrièra èrsa de protèstas.
 
De milièrs de personas manifestèron malgrat l’enebicion. La polícia i reagiguèt amb una violéncia inedita e desmesurada,  e Hong Kong viu ara las situacions pus violentas que se’n remembra. La polícia a tabasat de mond per carrièras, an lançat una granda quantitat de gases lacrimogèns e quitament son intrats dins lo mètro en picant qualques personas. Los manifestants i an reagit en levant de barricadas e en atacant lo sit del govèrn de la ciutat e mai d’un comissariat.
 
 
Cauma generala
 
An cridat a una cauma generala qu'es a paralisar la vila aquestes diluns e dimars, malgrat la reaccion encara pus violenta de las autoritats, que son clarament superadas per aquesta situacion.
 
Sembla que lo govèrn de China vòl pas reprimir las protèstas dirèctament, car a reclamat al govèrn de la vila qu’emplegue tota la violéncia que caldrà per redreiçar la situacion.
 
Çò que comencèt coma un movement de protèsta contra la lei d’extradicions devèrs China a evoluit devèrs una revolucion que revendica lo drech d’elegir democraticament lo govèrn d’Hong Kong. E mai pren de mai en mai fòrça l’ipotèsi de l’independéncia coma vila-estat.