capçalera campanha

Actualitats

InternacionalIstòriaPolitica

Alemanha a demandat perdon a Polonha

Dimenge passat, se commemorèt a Varsòvia l’ochanten anniversari de l’invasion de Polonha, que marquèt lo començament de la Segonda Guèrra Mondiala

Euròpa se recòrda ongan de l’ochanten anniversari del començament de la Segonda Guèrra Mondiala, lo conflicte mai murtrièr de l’istòria de l’umanitat. L'eveniment se commemorèt mai que mai a Varsòvia dimenge passat, en remembre d’aquel primièr de setembre de 1939, quand l’armada de l’Alemanha nazi envasiguèt Polonha. Dins una ceremònia, lo president d’Alemanha, Frank-Walter Steinmeier, demandèt perdon, acompanhat per la cancelièra Angela Merkel:
 
“Dins cap d’autre endrech d’Euròpa es mai malaisit per ieu de m’adreiçar a vosautres dins mon alemand nadiu... Demandi perdon per la fauta istorica d’Alemanha e reconeissi nòstra responsabilitat”, çò diguèt Steinmeier en nom de son país davant qualques caps d’estat e de govèrn.
 
Abans aquelas paraulas, lo president de Polonha Andrzej Duda aviá inaugurat l’eveniment en fasent una crida a la “responsabilitat” de transmetre a las generacions avenidoiras “l’orror” d’aquela guèrra. “Jamai se pòt pas tornar far, e per aquela rason nos cal remembrar d'aquò. Tirar de conclusions d’aqueles faches”. Dins son discors, Dura afortiguèt que caliá explicar als joves tot çò que se passèt e manténer dobèrts los camps de concentracion amb de tòcas didacticas.
 
A Varsòvia esperavan la venguda del president estatsunidenc Donald Trump, mas fin finala i anèt son vicepresident Mike Pence. Dins son discors, Pence o profechèt per sollicitar dels aliats de l’OTAN un aument de lor budget militar del temps que soslinhava l’engatjament de son país amb la seguretat de sos sòcis, en exigissent d'eles que compliguèsson “lors promessas”.
 
D’autras vilas polonesas tanben ramentèron dimenge aquel 1r de setembre. Foguèt lo cas de Wieluń, que patiguèt fòrça lo bombardament de l’aviacion nazi, e de Westerplatte, ont i aguèt las primièrs fusilhadas d’aquela guèrra.
 
 
 
 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

POUM - CNT
1.

D’autras vilas polonesas tanben ramentèron dimenge aquel 1r de setembre. Foguèt lo cas de Wieluń, que patiguèt fòrça lo bombardament de l’aviacion nazi : ne patiguèron tant coma Gernika ? A la fruita, se coneis l'arbre… E dire que i a pegasses encara per soténeer uèi lo dia politicians d'aquela santa p… d'estraça, pertot en Euròpa.

  • 2
  • 0

Escriu un comentari sus aqueste article