De grandas perturbacions se debanèron ièr e abans ièr dins los camins de fèrre del centre-oèst d’Occitània, mai que mai a la gara de Tolosa-Matabuòu, après que dos contrarotlaires foguèron agressats a la gara de Tolosa-Santa Anha. D’unes exerciguèron lo lor drech de retirament en provocant de nombroses retards sus las linhas.

Dos contrarotlaires de l’SNCF, un òme e una femna, foguèron agressats per dos viatjaires, dimars passat, aperaquí a 15h, dins lo tren 870309 que veniá d’Aush e qu’arribava a la gara de Tolosa-Santa Anha, del temps que controtlavan una persona amb un títol de transpòrt non valid.
 
Los contrarotlaires de la region, espantats per l’agression, faguèron valer lo lor drech de retirament a partir de 16h30, çò que provoquèt de nombrosas perturbacions del trafec ferroviari per tot lo centre e l’oèst d’Occitània. Cal dire que la preséncia dels contrarotlaires dins los trens de l’SNCF es indispensabla car son eles que barran las pòrtas e dispausan las claus dels trens.
 
Lo sindicat SUD Rail qualifica aquelas agressions d’“inadmissiblas” e explica que los contrarotlaires “an sentit tocada la lor integritat fisica”. Del sieu costat, la direccion regionala de l’SNCF condemnèt aquelas agressions contra los “agents del servici public en mission”.
 
Las organizacions sindicalas an demandat una amassada immediata amb la direccion per parlar de la politica de seguretat dins los trens.
 
La direccion regionala de l’SNCF indicava de retards de mai de 40 minutas de mejana, quitament d’anullacions de trens. A l’ora d’ara, la situacion es ja normala.