Lo president de la Generalitat de Catalonha en foncions, Quim Torra, faguèt un parladís dijòus passat a Madrid dins l’encastre de dejunars informatius qu’organiza l’agéncia Europa Press. Aquí Torra expliquèt qu’en Catalonha i auriá “una responsa de país” a la senténcia judiciària contra los presonièrs politics, e quitament faguèt una crida a “la desobesisença civila” en cas d’un non-aquitament. Dins aquel sens, afirmèt que la cauma generala es un drech e que la senténcia dobririá una nòva estapa ont “[caldriá] dessenhar lo camin per aténher la cima de l’independéncia”.
 
Dins son discors, Torra prenguèt Aran per exemple. “Vosautres coneissètz la Val d’Aran. Los araneses an la reconeissença del drech d’autodeterminacion, e s’un jorn decidisson, en referendum, de venir independents, la sola causa que pòsca far es de los persuadir que se n’anen pas”.