La linha Turin-Niça es considerada coma una de las pus bèlas del Mond, segon lo classament que l’a fach la revista alemanda Hörzu, un reportatge suls melhors trajèctes de tren de la planeta. Aquela linha, que travèrsa las vals de Ròia, Vermenhana e Pes, es la novena pus polida dins una lista dels “dètz trajèctes unics per los que voldràn gaudir, amb estil e calma, de païsatges espectacloses”.
 
Davant la linha dels Alps occitans, i a la Transcanadenca, que fa 4500 km de l’Atlantic fins al Pacific, l’Indochinesa de Bangkòk a Singapor, lo Royal Scotsman amb de veituras a l’anciana que partís d’Edimborg, lo tren roge Bernina Express dins lo canton soís dels Grisons, l’Orient Express entre Londres, Venècia e Istambol e l’Hiram Bingham de Peró que jonh Cusco e Machu Picchu.
 
Aquela linha es la tòca d’una revendicacion ciutadana que ne defend lo mantenement e lo desvolopament, car es de mai en mai abandonada. Dempuèi la fin de 2012, los trens entre Ventemilha e Coni s’arrèstan pas pus dins las pichonas estacions liguras e occitanas, çò qu’a portat una catastròfa al torisme local e als emplecs de Val de Ròia, mai que mai a Tenda e la Briga. Los usatgièrs del país que fasián servir aquela linha joglavan ja abans amb las correspondéncias de las companhiás dels dos estats. Ara, solament los trens de l’SNCF s’arrèstan a Fontan-Saorj, a Sant Darmatz de Tenda, a la Briga e a Vievòla.
 
Pel 3 de març que ven, es anonciada a Roma una reünion entre parlamentaris e foncionaris regionals e los ministèris dels afars exteriors e dels transpòrts dels estats francés e italian per lo renovelament de la convencion interestatala signada en 1970, que prevei qu’Itàlia pague los còstes de mantenença de la linha, çò rapòrta La Stampa.