Lo Salon Internacional de la Seguretat e la Qualitat Alimentària (SISQA), que se debana al Pargue de las Exposicions de Tolosa entre lo 13 e lo 16 de decembre, balha la plaça a la lenga occitana dins l’encastre de las mòstras consagradas als produches regionals. Los responsables del labèl “Òc per l’occitan”, que promòu la mesa en valor e l’usatge de la lenga del país dins lo terren economic e comercial, presentan cada jorn qualques productors e lors produches als vesitaires de la fièra.
 
De fach, l’intencion de fons, al delà de la quita promocion dels produches alimentaris regionals, es de demostrar que la lenga occitana es un esplech util al servici del dinamisme economic, mai que mai a respècte de l’economia de proximitat, e qu’es enrasigada dins lo territòri, çò que li balha una valor aponduda de qualitat. Pendent los quatre jorns, se fa divèrses talhièrs de cosina d’especialitats de diferentas regions occitanas e se fa de degustacions de produches alimentaris de qualitat, amb una especiala atencion a la carn e als vins.
 
En aquela escasença, de mai, los responsables de la campanha fan difusion de divèrses vidèos en linha dins la quita encencha del SISQA. Al total, un vintenat de productors e d’entrepresas del sector que participan a la fièra an ja lo label “Òc per l’occitan” o, e mai se l’an pas encara, an optat per participar activament a la campanha. Dins aquel sens, l’experiéncia servirà a difondre lo succès de la campanha del labèl “Òc per l’occitan” a travèrs d’una documentacion, per fin d’encoratjar d’autres professionals occitans a s’i interessar, per obténer lor labèl pròpri. Cal soslinhar qu’aquelas activitats an lo sosten institucional del conselh regional de Miègjorn-Pirenèus e dels departaments de Gers, dels Nauts Pirenèus e de Tarn, çò que demòstra lo creissent interès e l’engatjament de las administracions en la recuperacion de la lenga e l’identitat del país.




_____
Per mai d'informacions recomandam l'article “Inauguracion politica del SISQA” del blòg Democracia per Occitània