La rintrada escolara es arribada negra en Occitània. Son fòrça los collègis e los licèus del país qu’an suprimit sas classas d’occitan. Abans las vacanças, los ensenhaires del collectiu per l’ensenhament de l’occitan dins l’acadèmia de Tolosa (CRÈO Tolosa) avián anonciat que se prevesiá pas cap de dobertura de classa dins lo primari e dins lo segondari e que mancava 168 oras mentre qu’una vintena de collègis e licèus èran a barrar de corses o a los limitar. Atal s’es passat almens a Murèth, Pins e Justaret (Tolosan) e Le Vernet (País de Pàmias), segon çò qu’an raportat de legeires a la redaccion de Jornalet, e mai lo Ministèri de l’Educacion francés aja assegurat la “santuarizacion” de las classas bilinguas.
 
Lo licèu Pèire d’Aragon de Murèth, que recep los ancians collegians del collègi Betança, just a costat, ven de suprimir d’autoritat la seccion d’occitan (LVB/LVC segon la novèla formula de la Lei Blanquer per designar las lengas ensenhadas). Los collegians son, majoritàriament, d’èx-escolans de la calandreta qu’ara poiràn pas pus seguir los estudis en occitan ni mai un cors d’occitan.
 
D’autre caire, los liceans del licèu Vernant, establiment vesin de Pins e Justaret, se tròban, eles tanben, confrontats a la supression de l’opcion occitan, mentre qu’èran nombroses los inscriches que ne fasián, qualques unes despuèi mai de cinc ans.
 
En mai d’aquò, lo collègi Marcèl Doret del Vernet s’es trobat obligat de devesir per dos lo pauc d’oras que donava cada setmana en occitan, mentre que lo collègi Antonin Perbòsc d’Autariba decidissiá unilateralement de la supression de l’opcion engatjada sus tres ans.
 
Per poder avalorar l’amplor de la tragèdia, e aver de chifras, la Federacion dels Ensenhaires de Lenga d’Òc (FÈLCO) es a realizar una enquista, primièr dins los collègis e licèus de l’Acadèmia de Tolosa e puèi a l’escala de tot l’espaci occitan.