Super League, Championship e NRL: vaquí lo temps de las fasas finalas e de las partidas eliminatòrias: qualificacion per d'unes, lo temps de las vacanças per d'autres, coma los Dragons Catalans arribats enfins al tèrme d'una sason pietadosa.

Championship: Tolosa va desfisar Toronto
 
Pel primièr torn de las pelhòfas, Tolosa a balhat una leiçon de rubgi a York sus la pelena de Blanhac: iniciativas ofensivas, defensa solida, alternància entre davants e tres-quarts, bona circulacion de la palma. Victòria dels occitans que marcan 8 ensages: 44-6.
 
Pel segond torn, cal ara traversar l'ocean Atlantic per jogar a Toronto. Se los Blaus ganhan, seràn en finala; se pèrdon, auràn una sesilha de recobrament a Blanhac fàcia al ganhant de York-Featherstone . En perdent a domicili 34-18, fàcia a Featherstone, los Centurions de Leigh son los primièrs eliminats de la corsa a la montada.
 
 
Super League: Londres en Championship
 
Divendres de ser, calguèt esperar una sesilha de punt en aur a Salford per saupre lo classament definitiu de la sason 2019 de Super League.
 
Batut largament dijòus a Wigan (26-8), Castleford vesiá sa qualificacion per las pelhòfas remesa en causa. Mas, divendres, Hull FC perdiá contra lo primadièr St Helens 6-22 e daissava la cinquena plaça qualificativa als Tigres. En batent Warrington, Leeds remandava los Lops a la quatrena plaça.
 
Las autras tres partidas concernissián de formacions que podián davalar en Championship.
 
Wakefield tuèt lèu lo suspens en dominant Londres 19-10 e en remandant los jogaires de la capitala a l'escalon inferior aprèp una sola sason en Superliga. A Wakefield, sus la darrièra accion de la partida, lo fenolhedenc Morgan Escarré se nafra e deurà èsser operat de l'espatla: pas d'astre!
 
Los Dragons presentavan sus la pelena una formacion rejovenida en rason d'una infirmariá plena, amb un sol jogaire dels antipòdes e tres britannics sus la pelena. Los joves Dracs, occitans e catalans, menèron abans de plegar sus un ensag dels Gigants dins las darrièras minutas: corta desfaita doncas 24-22. Èra ora pels Sang e Aur que la sason s'acabèsse: rendètz-vos lo 4 de novembre per la preparacion de la sason 2020.
 
Hull KR butèt Salford fins al punt en aur: un tombat (17-16) confirmèt la tresena plaça dels Diables Roges.
 
Pel primièr torn de las pelhòfas, St Helens benefícia d'una dimenjada sens partida; Warrington reçauprà Castleford, dijòus de ser; Wigan reçauprà Salford, divendres de ser.
 
La fasa de classament s'es acabada amb aquelas posicions:
 
1) St Helens, 52 punts, + 521; 2) Wigan, 36, + 160; 3) Salford, 34, + 186; 5) Castleford, 30, + 88; 6) Hull FC, 30, - 123; 7) Catalans, 26, - 190; 8) Leeds, 24, + 22; 9) Wakefield, 22, - 115; 10 ) Huddersfield, 22, - 207; 11) Hull KR, 22, - 220; 12) London Bròncos, 20, - 282.
 
 
NRL: Polets e Canberra en mièjas finalas
 
En Austràlia, se jogavan las primièras quatre partidas de la fasa eliminatòria.
 
Dins lo bas del tablèu, Manly mestrejava las Làmias 28-16 e las Anguialas de Parramatta, amb lo dobertura Moses a la manòbra, assucavan e atomizavan los Bròncos de Brisbane: 58-0! Brisbane e Cronulla an atal acabada la sason.
 
Dins lo naut del tablèu, dijòus, los Lapinons existèron pas fàcia als Polets: desfaita 6-30. Dissabte, cò del cap de fila Melbourne, se tenguèt la partida mai sarrada e mai engatjada d'aqueste torn. Canberra marcava tre la debuta, Melbourne marcava una penalitat just abans la pausa e un ensag transformat e una novèla penalitat tre la represa. Las doas esquipas prenián d’iniciativas, mas las defensas tenián còp. A tres minutas de la fin, un tres-quarts local perdiá la palma dins sos dètz mètres: Canberra ne profeitava per marcar l'ensag de la victòria: 12-10. Còp de tron cò de la Tempèsta!
 
Dins una quinzenada, las mièjas finalas opausaràn doncas lo 27 de setembre Canberra e los ganhants del rescontre Lapinons-Manly (partida jogada dissabte) d'una part; l'endeman, los Polets rescontraràn los venceires de la partida Melbourne-Parramatta que se jogarà divendres. La finala se debanarà lo dimenge 6 d'octòbre a l'ANZ-Stadium de Sydney.
 
 
 
 
Alan Roch