S’es publicat qualques fòtos del cap de l’oposicion de Veneçuèla, Juan Guaidó, acompanhat de membres d’un grop paramilitar de narcotrafegaires en Colómbia. Aqueles imatges se faguèron en febrièr passat quand Guaidó aviá quitat clandestinament lo país per assistir a un concèrt que se fasiá en Colómbia, près de la frontièra, contra lo regim veneçolan. Aquel jorn, l’oposicion veneçolana, amb lo sosten dels Estats Units, ensagèt de far intrar d’ajuda umanitària en Veneçuèla, mas i reüssiguèron pas e l’ensag s’acabèt amb d’incidents fòrça grèus.
 
De son caire Guaidó, conegut per s’èsser autoproclamat president de Veneçuèla, afirma que lo govèrn de Maduro vòl distraire l’atencion amb aquelas fòtos. A pas contestat los imatges mas a dich que sabiá pas qual èran aquelas personas. "I aguèron de centenats de fòtos aquel jorn e après que foguèrem arribats al concèrt, de milièrs. Èra complicat de triar qual demanda una fòto", çò a declarat per se defendre. Pel president Nicolás Maduro s’agís d’un escàndol enòrme.
 
Lo procuraire general de Veneçuèla a anonciat qu’examinariá los imatges per “esclarir los sospechats ligams de Guaidó amb d’organizacions paramilitaras”.
 
Las tensions entre los govèrns de Veneçuèla e Colómbia son ara fòrça grandas e inquietantas e las frontièras refortidas per d’efectius nombroses de las respectivas armadas, après que Nicolás Maduro a anonciat que se cercava tornarmai d’atemptar a sa vida.