capçalera campanha

Actualitats

EconomiaInternacionalPoliticaSciéncia

Espanha a mes son vèto a l’acòrdi occitanocatalan del corredor mediterranèu de 5G

Los govèrns de Catalonha e de la region dicha Occitània ne devián far la presentacion en junh passat a Bucarèst, mas una intervencion del ministre Borrell s’i opausèt e la presentacion se deguèt cancelar

Lo ministre espanhòl dels afars estrangièrs a exigit de la Comission Europèa d’arrestar l’acòrdi entre la Generalitat de Catalonha e la region qu’a pres lo nom d’Occitània per un projècte que permetriá de far circular de veituras autonòmas sens menaire gràcias a la tecnologia mobila 5G.
 


Lo govèrn espanhòl a mes son vèto a un acòrdi signat entre los govèrns de Catalonha e de la region qu’a pres lo nom d’Occitània. S’agís del projècte de corredor 5G entre las autoestradas AP7 (al sud) e E9 (al nòrd) que permetriá de far circular de veituras autonòmas sens menaire gràcias a la tecnologia mobila 5G, pensada tant per menar de passatgièrs coma per transportar de mèrças. Ara lo projècte es paralisat après las pressions del ministre dels afars estrangièrs espanhòl, Josep Borrell, çò rapòrta Catalonha Ràdio.
 
Èra una escomesa de l’Union Europèa que vòl finançar de projèctes d’aquela mena que sián transfrontalièrs. Los govèrns de Catalonha e de la region dicha Occitània ne devián far la presentacion en junh passat a Bucarèst (Romania), mas una intervencion del ministre Borrell s’i opausèt e la presentacion se deguèt cancelar.
 
Segon las informacions desveladas ièr per la ràdio catalana, lo ministre espanhòl telefonèt a la Comission Europèa per demandar la suspension de la presentacion, ont se deviá aprovar un plan de trabalh per tal de començar lo projècte amb de fonzes europèus. O confirmèt a l’antena  lo conselhièr de las politicas numericas de la Generalitat Catalonha, Jordi Puigneró.
 
Segon lo ministèri espanhòl, lo document que los elegits occitans e catalans èran a mand de signar a Bucarèst èra pas adaptat al lengatge juridic pròpri d’un tractat internacional d’aquelas caracteristicas. Dins aquel sens, prepausava  divèrses cambiaments a la Generalitat, per exemple, que deviá comprene una referéncia al “Reialme d’Espanha” cada còp que se mençonariá la Generalitat e que Catalonha se presentariá coma un “país” o una “partida signatària”.

 
 
 
 
 


Fuente:  brokeravis.com

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

Pitaluga
1.

Sabèm que lo Borrell fa pas aquò per umanisme mas per anticatalanisme primari. I a d'annadas qu'escupís dins lo lach que l’a noirit.
Ara, dich aquò, tot çò que pòt arrestar l’espandiment de la 5G es bon. N’i a pro d’aquel tren fòl que cada còp va mai vite e que los maquinistas vòlon pas frenar.
La valor cardinala es, coma mai va, ganhar mai de temps ; çò que vòl dira ganhar d’argent, pels 1% que son amont. Òm sap tròp ben que lo temps es d’argent !
Ç.Q.C.D. (Çò que caliá demostrar).

  • 12
  • 1

Escriu un comentari sus aqueste article