Cymdeithas considèra que “la casuda” de la lenga “dins totes los comtats de l’oèst es un motiu de granda preocupacion”. La lenga celtica es parlada a l’ora d’ara per 19% de la populacion, mentre que fa dètz ans, o èra per 21%. Lo govèrn considèra que “l’avenir del galés es dels enfants e dels joves”.

L’associacion per la lenga galesa Cymdeithas considèra que “lo galés es en crisi”. Es una de las principalas conclusions que l’entitat extrai dels resultats del cens de 2011, que se presentèron dimars passat. Segon aquelas donadas, lo galés es parlat per 562 000 personas, una davalada davant las 576 000 que lo parlavan fa dètz ans. La pèrda equival a 2% de la populacion del país (de 21% en 2001 a 19% uèi) e plaça lo galés près del sieu percentatge istoric mai bas (en 1991, quand la lenga èra parlada per 500 000 personas, 18,5%).
 
La nòva es estada un còp dur per la planificacion lingüistica al País de Galas, mai que mai après que lo govèrn galés aja dich que la siá tòca èra d’aumentar lo nombre de parlants de la lenga de 5% pendent lo decenni passat. Ara que se sap los resultats del cens, lo govèrn ensaja de s’assolaçar en disent que “l’avenir de la lenga galesa es dels enfants e dels joves”. Lo cens ditz que 33,7% dels enfants d’entre 3 e 9 ans parlan galés, una chifra que puèja fins a 35,5% entre aqueles qu’an entre 10 e 19 ans. Mas es ja solament de 17% demest los joves entre 20 e 29 ans.
 
“Pendent las darrièras dètz annadas, [lo govèrn] a pas donat lo sosten que caliá a la lenga galesa”, çò diguèt lo president de Cymdeithas, Robin Farrar, per qui “lo pòble de Galas balha fòrça sosten a la nòstra lenga, mas lo govèrn a pas tanta ambicion”.
 
 
Las pèrdas a l’oèst, “motiu de granda preocupacion”
 
Cymdeithas es fòrça critic amb la situacion dins los bastions occidentals del galés. Lo cens mòstra qu’a Ceredigion, los parlants de la lenga an tombat en dejós de 50% (èran 52% fa dètz ans, e son ara 47,3%), ço meteis se passa a Carmathenshire (de 50,3% a 43,9%). “La davalada dins totes los comtats de l’oèst es un motiu de granda preocupacion”, çò ditz Farrar, que considèra que cal sometre de tèmas economics: “Cal una renaissença economica, a escala locala, dins los airals que parlan tradicionalament galés, se çò que vòlon es inversar la davalada e assegurar un avenir durable pel galés pertot en Galas”.
 
Mai d’informacions sus BBC News.
 
 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.