La Comèdia Tolzana, lo grop de bodegas Brancaleone e los dançaires del grop Estèrri acompanharàn la serada.

Uèi, a sièis oras del ser, a l’11 de la carrièra Malcosinat de Tolosa, l’Ostal d’Occitània de Tolosa festeja sos sièis ans d’existéncia. Foguèt lo 16 de decembre de 2006 que lo President de Convergéncia Occitana —l’associacion que gerís lo luòc— poguèt inaugurar l’Ostal, amb lo cònsol de Tolosa, lo President del Conselh General de la Nauta Garona e lo President de la Region de Miègjorn-Pirenèus de l’epòca. Uèi, l’Ostal d’Occitània es lo sèti e lo centre de creacion e d’administracion de qualques 80 associacions recampadas dintre Convergéncia Occitana, la federacion causida per la comuna de Tolosa per portar lo projècte cultural de l’Ostal d’Occitània.
 
L’Ostal es un espaci dedicat a la creacion e al raionament de la cultura e de la lenga occitanas. Aquel luòc de bona convivéncia, d’animacion e de creacion compren un espaci scenic, una estructura d’acuèlh e d’informacion del public, d’espacis de mòstras, una botiga e de salas de rescontres. Una de las caracteristicas de l’Ostal es que s’agís de dos bastiments classats “monuments istorics”, dins lo quartièr Esquiròl del centre de Tolosa: l’Ostal de Boisson (Ostal capitular d’estil Renaissença) e l’Ostal de Cheverrí (son extension al sègle XVIII).
 
Per festejar aquela capitada, l’Ostal dobrís uèi las pòrtas a sièis oras del ser amb la musica dels bodegaires tolosans de Brancaleone. En seguida, se farà un discors d’omenatge al grand comedian, artista e presentaire de television occitan Maurici Andrieu, que moriguèt lo 15 de novembre de l’an passat. Après lo discors, la Comèdia Tolzana jogarà una representacion teatrala tanben d’omenatge a Andrieu e en seguida lo grop Estèrri ofrirà un balèti occitan fins a dètz oras del ser. A uech oras es tanben previst un sopar gascon, amb de fetge gras, de magret e las melhoras mangiscas del costat occidental de Garona.