Lo sit dedicat a las minutinas es ara en linha. Se pòt veire en clicant sul ligam: www.minutinas.org. En mai d’aquò, s’es tanben creat l’intrada “minutina” sus Wikipèdia en occitan.

 

Cada tèxt a sa pagina pròpria e tanben cada autor. Tot es abondosament illustrat. Podètz trobar las minutinas de la sason passada mas ja de minutinas de la sason 2020. Lo projècte dels creators es d’alargar la jurada e de fixar la data limit al 30 d’octòbre 2020, anniversari de la publicacion del primièr article que demandava de mandar los primièrs tèxtes.

 

Mas lo projècte es encara mai ambiciós qu’aquò. Ja una premaqueta de la version audiofonica de la minutina entitolada La Guèrra dels Clans de Pèire Tommasi, que ganhèt lo prèmi ongan es estada realizada (mes pas encara acabada) e los creators se viran cap a la realizacion de filmets d’una minuta.

 

S'aviarà lèu la crida als actors de teatre occitan d’escriure e de jogar de peçòtas d’una minuta amb l’amira d’un festenal. L’idèa de cançons de la meteissa durada es estada evocada.

 

Mentretant, vos desiram una bona descobèrta del sit e dels tèxtes creatius contemporanèus occitans.

 
 
 

---

De vesitar: www.minutinas.org