Aquel presumit complòt implicava de tuar tanben lo gardacòrs de Bieber e doas personas mai, segon lo rapòrt d’un tribunal del Nòu Mexic ont dos dels acusats son encausats per conspiracion d’assassinat, tostemps segon la CBS.

Un afogat de Justin Bieber, Dana Martin, foguèt lo que pensèt aquel plan. Pasmens, l’òme lo confessèt a la polícia e delatèt los sieus sòcis. Segon la polícia, l’òme, de 45 ans, qu’es dins una preson del Nòu Mexic, es obsedit per lo cantaire e a un tatoatge d’el sus una camba.
 
Dins la confession que faguèt a la polícia, Martin expliquèt qu’aviá planificat de tuar Justin Bieber, de 18 ans, perque lo cantaire respondiá pas a las letras que li escriviá e donc se sentissiá mespresat. Es per aquò que recrutèt Marcos Staake, de 41 ans, qu’aviá conegut dins la preson, e lo sieu nebot, Tanner Ruane, de 23 ans. Los dos devián viatjar a Vermont per tuar e castrar dos òmes coneguts de Martin, per de rasons qu’encara sabèm pas, e après se devián desplaçar a Nòva York. Ailà, dins l’encastre d’un concèrt que Bieber faguèt al Madison Square Garden a la fin de novembre, devián tuar lo cantaire e lo sieu gardacòrs.
 
Après que Dana Martin expliquèsse los sieus plans a la polícia, los dos sòcis foguèron arrestats, Staake a Vermont e Ruane a Nòva York. Èra en possession d’armas e de cisèls de podar. Son estats mandats al Nòu Mexic, ont deuràn afrontar de cargas per conspiracion d’assassinat.