La ròda vira e la palma ovala rebomba. Alara que las competicions s'acaban (Superliga, Championship, NRL), d'autras reprenon al país coma l'Elèit 2. Aurem doncas de qué vos contar de setmana en setmana.

Championship: Tolosa, los uèlhs per plorar
 
En Championship, lo desplaçament a Toronto aviá macat los tolosans. Dimenge de ser, a Blanhac, passèron a costat de la partida decisiva fàcia a Featherstone: manca de luciditat, aproximacions, defensa elastica, atacas occitanas transformadas en contras assassins. La nòta es salada amb un paquet de desillusion e de decepcion: victòria dels angleses 36-12.
 
Featherstone, qu'aviá finit cinquen al classament, a ganhat totas sas partidas de las pelhòfas a l'exterior cò del 4n, puèi cò del 3n e ara a Tolosa. Se pòt anar ganhar la bilheta de la montada a Toronto (dissabte 5 d'octòbre, 20h30 a l'ora occitana)? Aquò sembla improbable, mas…
 
Per Tolosa, èran los adieus a l'estadi de Blanhac. L'an que ven, lo TO jogarà sas partidas cò de l'Estadi Tolosan del XV: a l'estadi Ernèst Wallon.
 
 
Superliga: St Helens en finala
 
En Superliga, sens l'ombra d'una suspresa, St Helens a pres lo camin dirècte per la finala d'Old Trafford en batent un Wigan transparent: 40-10.
 
Coma Salford a redusit a res los espèrs de Castleford: 22-0, lo segond finalista sortirà de la partida Wigan-Salford que se jogarà divendres de ser.
 
 
NRL: Melbourne dins lo ròtle de la lèbre
 
La Tempèsta de Melbourne aviá dominat largament la fasa de classament, mas a mancat sas doas partidas de pelhòfas: desfaita a domicili fàcia a Canberra e desfaita contra los Polets. Melbourne dominèt lo segond temps, mas una contrataca dels òmes de Trent Robinson pleguèt la sason dels tempestaires. Marca finala: 14-6 pel campion 2018. Per ara, cap d'esquipa a gardat son títol NRL d'una annada a l'autra: los Polets poiràn èsser los primièrs?
 
Canberra es probablament pas d'aqueste avís: l'autra mièja finala vegèt un debanament parièr. Los Lapinons dominèron, mas foguèron victimas d'un ensag aürós que los arbitres vidèo metèron un brave moment a validar. Canberra deguèt remandar mièg dotzenat de còps de jols pals, mas lor defensa tenguèt. Quand los Lapinons finiguèron que marquèron, èra tròp tard. Qualificacion dels Raiders: 16-10.
 
Finala a l'ANZ-Stadium de Sydney, aqueste dimenge 6 d'octòbre (10h30, ora occitana; de seguir sus BeInSport)
 
 
Los Blaus a l'internacional
 
Aprèp la partida de las Províncias d'Originas d'aqueste dimenge a Sant Estève, que vegèt la victòria de l'Oèst sus l'Èst: 31-26, lo seleccionaire Aurelian Cologni balharà dins la setmana la tièra dels jogaires que partiràn disputar la Copa del Mond a 9 e tres partidas a 13 en Austràlia.
 
Los U19 son en virada en Nòva Zelanda. An ja remportat las doas primièras partidas de las quatre que jogaràn: 32-28 contra una seleccion U-20 de Canterbury e 28-18 contra una seleccion de U20 de Waikato.
 
 
Elèit 2: lo campion al tapís d'entrada
 
Aquesta darrièra dimenjada de setembre, se debanava la primièra jornada del campionat d'Elèit 2 amb onze formacions en competicion. Tre dissabte, lo campion Baó anava pèrdre lo derbí catalan cò dels vesins de Pià: 37-30; Vilagalhenc-Argon va ganhar a l'Escura d'Albigés: 28-18. Selon, darrièr la sason passada, engranja un 46-18 fàcia a Lion. Vilafranca va ganhar a Tolon: 32-18 e Entraigas ten a distància lo novèl vengut Illa de Tet: 22-16.
 
 
 
 
Alan Roch