La Pastorala de Nai festeja uèi son 10n anniversari amb una jornada festiva tota cargada de contes, cants, danças e teatre. L’eveniment ten una tièra d’artistas que prepausan, a partir de 15h, d’obradors de cants e danças, e puèi una granda serada espectacle a comptar de 20h30.
 
Tant l’espectacle coma los obradors son gratuits, e es una bona escasença per conéisser la cultura tradicionala del país de la man dels contaires David Bordes e Eric Monguilhoulou, dels grops de musica Ardalh, Batsurguère, Eths Cabilhous, e de la man dels acordeonistas de Lis e de la quita Pastorala de Nai.
 
Las pastoralas son una reminiscéncia del teatre popular medieval que se manten pro viva en Bearn e en Bascoat, e se fan tostemps dins la lenga del país, l’occitan o lo basco. Los espectacles mesclan lo teatre, lo cant coral e las danças tradicionals e son fruch d’un trabalh collectiu de tot un canton, d’una vila, d’un quartièr o d’un vilatge.